20 досетливи афоризми од македонскиот сатиричар Миле Ѓорѓиоски
Кога се продава душата, телото оди гратис.
***
Не доведова до лудило. Понатаму можеме сами.
***
Не пукаат во празно. Ни ги наполнија главите.
***
И кога државата части, народот плаќа.
***
Народот е добар како леб. А има и други мани.
***
Лажат дека земјата им е над се. Живи се.
***
И на Балканот нешто се менува. Годишните времиња.
***
Ме плашат неписмените, почнаа да ги оштрат моливите.
***
Не е време да се каже нешто добро за водачот. Жив е.
***
Сами смо криви што сме голи и боси. Дадовме се од себе.
***
Преминав на духовна храна. Се хранам по црквите.
***
Кај нас и дупките во законот се прават во име на законот.
***
Не е време за аутопсија. Сеуште ни кркорат цревата.
***
Сите се против нас. Среќа наша – светот е мал.
***
Нема што да барамево Европа, ние тука се изгубивме.
***
Не знам што ќе јадам денес. Не сум пророк.
***
За неписмените и бестселерот е тоалетна хартија.
***
Не нѐ плаши судниот ден. Ние сме темен вилает.
***
Ги закопаа воените секири. Во главите на пацифитите.
***
Тоа што е водачот слеп, не е негов, туку наш хендикеп.