Магијата на Кристалната река: Необично друштво за капење кое може да ве чини и до една година затвор

Сме слушнале за пливање со ајкули и делфини, но ако сакате нешто поинакво, пробајте ја реката Кристал во Флорида. На западната страна на полуостровот, кој гледа на Мексиканскиот Залив и каде морето продира во внатрешноста формирајќи амбиент на мочуриште, постои област наречена Кристална река.

Кога температурата на водата паѓа, купишта морски крави се упатуваат овде во потрага по топла вода. Целата област е богата со топли извори, па ова е како да одат на бања за нив. Тогаш реката Кристал станува место каде и вие можете да се вклучите во прскањето и нуркањето во водата со необично друштво.

Затоа реката Кристал ја нарекуваат и светска престолнина на морските крави (звучи чудно, но навистина е). Овој еко-туризам позитивно се одрази и на некои други земји каде што до неодамна морските крави сè уште беа ловени и убивани заради храна. Само за малтретирање на овие слатки животни овде ќе добиете парична казна од 100.000 долари или дури и една година затвор.

Водата е мирна, опкружена со многу зеленило и има мир и тишина, така што ова не е адреналинско искуство туку настан кој ќе ве одмори и релаксира. Морските крави се питоми и мирни и убаво е да се гледаат како лебдат под површината.

И тие ќе бидат среќни да ве поздрават – сепак, нека го направат тоа први и не им го нарушувајте мирот. Можеби изгледаат слатко, но по природа сѐ уште се диви животни.

Покрај пливањето со морски крави, можете да ја истражувате оваа прекрасна област во тивок кајак или да ја посетите плажата Форт Ајленд, каде што ве очекува филмско зајдисонце на типичните пространи американски плажи како што сме навикнати да ги гледаме во сериите.

А ако сакате нешто подиво, упатете се до блиските извори на Хомосаса каде ве чекаат алигатори, орли и секако – повеќе морски крави.