30 предградија на Сиднеј може да бидат потопени под вода како резултат на поројните дождови

Околу 30 предградија на Сиднеј се во опасност од поплави, додека 71 наредба за евакуација е издадена бидејќи обилните дождови продолжуваат да го погодуваат Нов Јужен Велс, кој ги доживеа најголемите поплави во последните 18 месеци.

Караван парк Валас, Ему Плајнс, делови од Пенрит, делови од Долен Портланд, Пит Таун, Агнес Бенкс и Јужна Марута беа последните региони кои добија наредба за евакуација до понеделник наутро.

Повеќе од 32.000 луѓе ширум државата веќе се принудени да ги евакуираат своите домови, додека други 6.000 луѓе се предупредени да бидат внимателни и подготвени да си заминат бидејќи се воведени уште 64 предупредувања за евакуација.

Големи поплави се случија во Северен Ричмонд, нивото на реката се искачи над нивото постигнато во март (15,92 метри) со можни понатамошни зголемувања, а зголемените нивоа на водата во басенот на Сиднеј, Хоксбери Непеан и реката Жорж предизвикуваат голема загриженост.

Камден е меѓу најтешко погодените области, при што градот е поплавен по четврти пат оваа година, додека делови од Лансвејл, Чипинг Нортон и Мурбенк исто така преминаа под вода.

Државната служба за вонредни состојби одговорила на 3.500 повици за помош од викендот, при што во текот на ноќта биле направени 400 повици, а извршени се околу 120 спасувања од поплавите, а се очекува оваа бројка да се зголеми.

Бирото за метеорологија исто така истражува дали торнадо оштетило 40 домови во Беламби и Коримал, во регионот Илавара, во неделата.

Влажните услови ги принудија спасувачките тимови да ги откажат плановите за транспорт на 21 член на екипажот заробени на товарен брод што се насука во близина на брегот на Нов Јужен Велс.