Живот на Марс? НАСА откри разновидна органска материја на Црвената планета

На површината на Марс повторно се пронајдени органски молекули, кои би можеле да им дадат на научниците свежи индиции за тоа дали некогаш постоел живот на Црвената планета.

Слични молекули кои содржат претежно јаглерод, водород, кислород, азот и сулфур претходно биле откриени во метеоритите на Марс и во кратерот Гејл на планетата.

Сега, роверот Perseverance на НАСА откри нови органски соединенија во кратерот Језеро на Црвената планета, древен езерски слив со „висок потенцијал“ за погодност за живот во минатото. Наодите сугерираат дека во минатото можеби постоел покомплексен систем отколку што претходно се мислеше.

Дознавањето повеќе за оваа органска материја може да им помогне на експертите да откријат дали некогаш имало живот на Марс. Но, самото откритие не укажува на постоење на живот. Овие молекули се поврзани со животот и биолошките процеси, но може да се создадат и од небиолошки процеси.

Тимот предводен од истражувачи од Калифорнискиот институт за технологија, го објави своето откритие во списанието Nature.

Тие рекоа дека може да има голем број објаснувања за потеклото на органската материја, вклучувајќи интеракции помеѓу водата и карпите, или наслаги од меѓупланетарна прашина или метеори. А ниту биотичкото потекло – добиено од живи организми – не е исклучено.

Тие напишаа: „Присуството и дистрибуцијата на зачуваната органска материја на површината на Марс може да обезбеди клучни информации за јаглеродниот циклус на Марс и потенцијалот на планетата да биде домаќин на живот низ нејзината историја“.

Д-р Џозеф Разел Холис, коавтор на трудот и научен соработник во Природонаучниот музеј, рече: „Не можеме да идентификуваме никакви специфични органски молекули од податоците досега, но со наоѓање примероци што може да содржат органски материи, ги означуваме како мошне интересно за понатамошно проучување, а складирани се неколку примероци кои се надеваме дека ќе бидат вратени на Земјата за подетална анализа“.

„Гледаме и широк спектар на различни сигнали низ Језеро, што е изненадувачки и возбудливо, бидејќи сугерира дека во кратерот Језеро можело да постоеле широк спектар на органски материи пред милијарди години. Иако сè уште не можеме со сигурност да кажеме дали на Марс тогаш можело да се живее, астробиолозите веруваат дека присуството на различни органски материи е неверојатно важно за потенцијалот на планетата или околината да биде домаќин на живот“.