Баталете ги стандардите совети за исхрана, ова е најефективната стратегија да ослабете, вели ново истражување

Сакате побрзо да ги постигнете своите цели за слабеење? Ново истражување покажува дека интермитентното постење, намалувањето на бројот на оброци во текот на денот и концентрирањето на калориите порано во денот, во период од најмалку 12 недели, може да помогне за поголемо губење тежина отколку стандардните совети за исхрана.

Истражувачите од Универзитетот Бонд во Австралија анализирале 29 клинички испитувања со вкупно 2.485 учесници за да утврдат дали е подобро да се промени времето на јадење отколку видот на храната.

Интермитентното постење или јадењето во ограничен временски период во денот, има донесено мешани резултати во претходни студии. Некои истражувања го поврзуваат овој метод со слабеење, намален ризик од дијабетес тип 2 и срцеви заболувања, намалено воспаление и подобрен имунитет. Но, едно големо истражување годинава покажа дека луѓето кои го ограничуваат јадењето на помалку од осум часа дневно се повеќе склони кон смртност од кардиоваскуларни заболувања отколку оние кои јадат во период од 12 до 16 часа.

Новата анализа, објавена во петокот во списанието JAMA Network Open, известува дека придржувањето до осумчасовен временски прозорец за јадење резултира со најголемо губење на тежината.

Истражувачите исто така утврдија дека учесниците со повисок индекс на телесна маса (BMI) изгубиле повеќе килограми отколку оние со понизок BMI.

„Со години избегнував временски-ограничено јадење бидејќи мислев дека е премногу трендовски и не му верував многу,“ изјави Стефани Шиф, регистриран нутриционист. „Но, со текот на времето и со повеќе прочитани студии, почнав редовно да го препорачувам“.

Шиф, која не била дел од новото истражување, го почитува дванаесетчасовното јадење, но препорачува секој да го прилагоди времето на јадење според својот животен стил и нутриционистички потреби.

Без разлика дали практикувате интермитентно постење или не, Шиф препорачува да не се јаде по 6 или 7 часот навечер.

„Кога престанувате со јадење до 7 часот, му давате на телото време да ја свари храната, метаболизмот почнува да се забавува, и по неколку часа, кога сте подготвени за спиење, мелатонинот може да се зголеми и да ви помогне да заспиете,“ објаснува таа.

Шиф исто така советува, доколку раната вечера не е возможна, да се има поголем оброк во средината на денот, а потоа да се намали внесот на храна кон крајот на денот.

„Можете да земете мал, здрав оброк неколку часа по вашиот голем оброк,“ додава Шиф.