Го посетив најопасното маало во Америка и не можев да си поверувам на очите (видео)

Со повеќе од 110.000 претплатници на YouTube, Вендл редовно документира посети на места кои се сметаат за „тешки“ за да им покаже на луѓето како навистина изгледаат.

Во своето најново видео, тој го посети Кенсингтон во Филаделфија, кој го опиша како „целосно поинаков свет“ и „поопасен“ од кое било место во Велика Британија кое досега го снимил. Вендл бил придружуван од локалниот јутубер Џеф, поранешен корисник на дрога, кој снима содржини за суровата реалност на оваа област.

Пред да зачекори во Кенсингтон, Џеф го предупреди Вендл: „Ќе станеш сведок на апсолутен хаос, лудило и беззаконие. Ќе биде неверојатно. Тешко е да се објасни некому што никогаш не бил таму“.

Кога стигнале, Џеф го подготвил Вендл за сликите на луѓе „кои лежат на улицата“. Објаснил дека овие луѓе се жртви на ксилазин, седатив познат како „транк“, кој заедно со фентанил предизвикува хаос во населбата.

„Мислев дека сум подготвен за тоа што ќе го видам, но веќе срцето ми се стегна,“ призна Вендл гледајќи луѓе паднати на улиците. „Веќе сум потресен, ја исклучив камерата.“

Џеф го запозна Вендл со неколкумина корисници, меѓу кои и жена која ја сподели својата тешка приказна. „Кога еднаш ќе се навлечеш на овие дроги, не е само ментално тешко да се оттргнеш од ова место. Тоа е како сила што те влече назад и не можеш да се оддалечиш многу. Сакам да ги видам моето семејство и пријателите, но секогаш морам да бидам блиску до ова место, затоа што веднаш се појавува криза. А и се навлекуваш на начинот на живот овде“ – признава таа.

Таа исто така го опишала искуството со повлекувањето од дрогата, додавајќи: „Не можеш да лежиш мирно, не можеш да се одмориш. Боли и кога ја земаш дрогата, и кога ја откажуваш“.

Друг корисник, маж кој живее на улица четири години, изјави дека секој ден е „борба за преживување“.: „Мораш да правиш што треба за да дојдеш до пари и да се дрогираш“ – вели тој.

Додека продолжуваат да возат низ маалото, Џеф и Вендл здогледуваат брза помош, за која Џеф претпоставува дека е таму поради предозирање. Во близина, маж луто гестикулира кон својот одраз во прозорецот, на што Џеф прокоментира: „Многу луѓе тука имаат проблеми со менталното здравје. Би рекол дека околу 80% од нив. Дури и ако престанат со дрогата, сè уште ќе им треба помош.“

Вендл подоцна признава: „Очигледно е дека има дилери насекаде. Тоа најмногу ми делува опасно од сето ова… Ова без сомнение е најстрашното место каде што сум снимал содржина.“ Џеф исто така открива дека речиси секој во маалото е вооружен, било со пиштол или со нешто друго.

Двајцата посетија и центар за рехабилитација, каде што зависниците живеат во заштитена средина. Една жена сподели дека програмата значително го подобрила нејзиниот живот, но признава: „Многу е тешко да бидеш во Кенсингтон и да останеш трезен“.

Таа раскажува и за редовните престрелки, вклучувајќи една во која куршум ја поткачил раката на нејзината пријателка.

Завршувајќи го видеото, Вендл им порача на своите гледачи: „Мислев дека сум подготвен за глетките и хаосот во Кенсингтон – но не бев. Длабоко ме потресе“.

Целото видео можете да го погледнете овде.

Доколку сакате добра акција или пак забегани и жестоки случки само за најхрабрите читатели, тогаш посетете го каналот Жестоко. Предупредување: Содржините може да ве вознемират!