Едно од најопасните места на земјата „Островот на змиите“: На луѓето им е забрането да одат и е дом на една од најсмртоносните змии во светот

Во ова темно и студено време, идејата за посета на живописен остров крај брегот на Бразил звучи привлечно. Но, ако планирате да избегате на сонце за Новата година, подобро избегнувајте го Иља де Кеимада Гранде, познат како „Островот на змиите“.

Се смета за едно од најопасните места на планетата, а луѓето не смеат да го посетат без посебна дозвола.

Островот, кој е со големина од само 43 хектари, е дом на околу 4.000 змии, вклучувајќи ги и најсмртоносните видови во светот.

И покрај она што можеби го замислувате, ако го разгледувате островот на Google Maps, нема да видите огромна змија на сред пат.

Сепак, еден специфичен вид змија отровна наречена „бразилско копје“ е ексклузивна за Островот на змиите. Позната и како Bothrops insularis има исклучително смртоносен отров, кој им помага да се хранат главно со птици, гуштери и други мали животни.

Возрасните змии обично достигнуваат должина од 70 до 118 см, со жолти тела обележани со кафени, лисјоподобни шари, според JungleDragon.com.

Сепак, овој вид е класифициран како критично загрозен.

Тара Браун од 60 Minutes Australia, која го посети островот во 2019 година, рече: „Овие змии не постојат никаде на друго место освен на Кеимада Гранде. Нивната изолација им овозможила еволуциски карактеристики. Тие се пет пати поотровни од своите копнени роднини и ловат птици. Можеби се едни од најотровните суштества на планетата, но вистинската закана е насочена кон нив, а не кон нас. Иако Островот на змиите можеби изгледа идилично место за змиите, изолацијата не гарантира заштита на неговите уникатни жители. Сечењето на шуми на копното го намалува бројот на птици кои некогаш застанувале тука на нивните миграциски патеки. Помалку птици значи помалку храна, а помалку храна, на крајот, значи и помалку змии.“

Но, ако некогаш налетате на змија во шума, експерт вели дека е малку веројатно таа да ве повреди – но само под еден услов.

Вит Гибонс, познат херпетолог кој проучувал змии повеќе од 60 години, изјави: „Кога одите низ шума, многу повеќе змии ве гледаат отколку што вие ги гледате нив. Тие не сакаат да бидат видени. Направивме различни истражувања кои покажаа дека можете да поминете покрај замотана ѕвечарка, а таа нема да се помрдне воопшто. Тоа е како да влегуваат во борба што не сакаат да ја почнат. Змиите не се грижат за нас, освен ако не станеме закана.“

Ова е одлично, Вит, но ние нема да ризикуваме.