Наставникот што не сакаше да го нарече својот ученик момче, девојче, конечно излезе од затвор – затворската казна била непотребна, немала да му ги промени ставовите

Ирскиот наставник Инох Бурк, кој беше затворен поради спор за одбивање да користи родово-неутрални заменки за трансроден ученик, е ослободен откако судот одлучи дека затворската казна е неефективна.

Евангелистичкиот христијанин беше затворен во септември за непочитување на судски налог што му забрануваше да пристапува на училиштето „Вилсонс Хоспитал“ во Ирска. Но, судијата Дејвид Нолан пресуди дека затворањето нема „пожелно принудувачко дејство“. Наместо тоа, Бурк сега ќе добива дневна парична казна од 1.400 евра за секој ден што ќе ја прекрши наредбата.

Минатогодишната казна од 700 евра дневно исто така беше неефективна, бидејќи Бурк одби да ги плати, а неплатените казни достигнаа 193.000 евра. Судот предложи, ако продолжи со прекршување, неговата плата директно да се искористи за покривање на казните.

Спорот започна во мај 2022 година кога Бурк, поради своите верски убедувања, одби да ги користи заменките „тие“ за ученик кој транзитира од еден пол во друг. Тој јавно ја критикуваше одлуката на училиштето, а судијата оцени дека неговото присуство ги нарушува дневните активности и работата на училиштето.

Бурк, кој беше отпуштен во јануари 2023 година поради „грубо недолично однесување“, остана на платен список додека ја обжалува одлуката за отказ. Судијата истакна дека Бурк се претставува како „маченик“ и го искористува затворот за лични цели, тврдејќи дека судот ги нарушува неговите религиозни права.

И покрај контроверзиите, Бурк продолжува да го оспорува своето отпуштање и судските одлуки, тврдејќи дека бил принуден да поддржува идеологија спротивна на неговите верски убедувања.