Од дете до стабилен возрасен човек: Како детските емоции влијаат на финансискиот успех во зрелоста?

Квалитетите кои ги водат луѓето до финансиски успех започнуваат уште во детството, според најновите наоди од студија започната пред 52 години.

Психолози од Нов Зеланд ги следат животите на 1.000 деца од градот Данедин од 1972 година, со цел да ги идентификуваат факторите кои најмногу влијаат на тоа како ќе се развијат во зрелоста.

Најдобрите показатели за успех кај возрасните немаат голема врска со академските постигнувања, создавање стабилни односи или работна етика. Наместо тоа, истражувачите утврдија дека оние кои станаа најуспешни возрасни имале повисоко ниво на самоконтрола и емоционална интелигенција (ЕQ) како деца.

Децата со висок EQ покажуваат повеќе емпатија, имаат позитивен став кон животот, носат информирани одлуки и отворено признаваат грешки. Од друга страна, оние со низок EQ почесто се соочуваат со финансиски тешкотии како возрасни. Во нивните 30-ти, ваквите лица имаат пониски примања, послаби финансиски навики, зависат од социјална помош и имаат помалку шанси да штедат, да поседуваат дом или да планираат за пензија.

Проценките за EQ кај учесниците биле правени редовно во детството, на возраст од 3 до 11 години, преку набљудување на однесувањето, интервјуа со родителите и анкети со наставниците.

Истражувачите заклучија дека способноста на детето да ги разбира и контролира своите емоции е тесно поврзана со професионалниот успех во зрелоста. Емоционалната интелигенција игра клучна улога и на работното место, помагајќи при соработката и комуникацијата со колегите.

Сепак, EQ може да се развива. Влијателните возрасни во животот на децата можат да помогнат преку охрабрување на комуникацијата, валидирање на нивните емоции и отворено решавање на проблемите.