„Google Maps“ реши мистериозно исчезнување на жена со Алцхајмер по две години во Белгија

Случајот на исчезнатата 83-годишна Паулет Ландрије од Анден, Белгија, беше решен благодарение на фотографија од „Google Maps“, две години по нејзиното исчезнување. Паулет, која боледувала од Алцхајмер, исчезнала во ноември 2020 година додека нејзиниот сопруг Марсел Тарет, кој се грижел за неа, ја оставил кратко време сама.

Марсел ја оставил пред телевизорот со ручек, но кога се вратил, таа веќе не била таму. И покрај брзата реакција на полицијата и потрагата со хеликоптер, Паулет не била пронајдена.

Две години подоцна, сосед разгледувајќи на „Google Maps“, забележал фотографија направена пред куќата на Паулет и Марсел. На сликата се гледа Паулет како се оддалечува, додека Марсел поставува облека на сушење.

Оваа информација била пренесена до истражителите, кои го следеле нејзиниот пат и го откриле телото во густа грмушка под стрмен рид, близу нивната куќа. Истражителите сметаат дека таа останала заглавена таму, неспособна да побара помош.

Приказната беше дел од видео на YouTuber-от MrBallen за „вознемирувачки приказни“, што предизвика емоционални реакции од гледачите.