Осамени сте? Тогаш ова место е за вас – специјалниот салон за гушкање во Полска, кадешто ќе можете да добиете внимание и прегратка, но не и нешто повеќе

Александра Касперек, полска претприемачка, сфатила дека понекогаш луѓето едноставно имаат потреба од прегратка. Нејзиниот салон за професионално гушкање, „Ania Od Przytulania“, отворен пред две години, стана толку популарен што клиентите чекаат на листа за закажување.

Салонот, кој е наменет за возрасни клиенти на возраст од 40 до 60 години, нуди сесии од еден или два часа кои помагаат во намалување на осаменоста и емотивниот стрес. Касперек изјавила дека инспирацијата за овој проект ја добила читајќи за слични услуги, додавајќи дека сака да создава нешто ново.

Процедурата започнува со воведен разговор и „мечешка“ прегратка, по што клиентот ги чита правилата, кои строго забрануваат сексуални дејствија. Сесијата се одвива во луксузна просторија со камин, меки перници и миризливи ќебиња, а клиентите можат да уживаат во кафе, топло чоколадо или шампањ.

Касперек вели дека покрај прегратките, таа нуди и „професионални коучинг сесии“, каде клиентите зборуваат за своите проблеми и потребата да се чувствуваат ценети. Многумина од нејзините клиенти се лица со трауми, страв од емотивна блискост или жртви на насилство, кои преку терапијата учат дека допирот може да биде пријатен и утешителен.

Научните истражувања потврдуваат дека прегратките го намалуваат крвниот притисок и стресот, што ги прави овие услуги особено барани во време на осаменост, зголемена поради пандемијата на КОВИД-19. Касперек смета дека „правилната стимулација на чувството за допир прави грижите да исчезнат, а животот да стане убав и безбеден“.