Нова година, нови теории на заговор: Американците вознемирени од „хемиска магла“ што се шири низ САД

Делови од САД се покриени со „мистериозна“ магла, што предизвика загриженост кај локалното население кое тврди дека маглата има „хемиски“ мирис и дека изложеноста на неа може да предизвика симптоми слични на грип.

Жител на Флорида изјави за Daily Mail дека почувствувал лошење по само 10 минути престој на отворено во маглата.

„За околу еден час почнав да кивам постојано три часа, а очите ми беа многу подуени,“ тврди жителот. „Се почувствував многу топло, како да имам температура, а стомакот ми се грчеше.“

Daily Mail ја спореди оваа појава со „Операција Си-спреј“ – таен експеримент за биолошко војување што го спровела американската морнарица во 1950 година.

Тогаш, бактериите serratia marcescens и bacillus globigii биле распрскувани над областа на заливот Сан Франциско за да се процени ранливоста на еден голем американски град на напад со биолошко оружје. Во таа операција, еден Американец загинал, а 10 други сериозно се разболеле.

Теории на заговор

Теориите на заговор експлодираа на социјалните мрежи, откако жители од повеќе сојузни држави пријавиле слични случаи, а забележувањата на дронови во некои области ги поттикнаа шпекулациите.

Онлајн снимки покажуваат честички што лебдат во маглата, што ги зголеми стравувањата дека станува збор за нешто повеќе од обична временска појава. Некои корисници шпекулираат дека тоа би можело да биде биолошко оружје.

„Описите на густата, долготрајна магла ги оставија луѓето болни – многумина искусуваат ненадејни симптоми на настинка или грип по само кратка изложеност,“ пишува еден корисник на платформата X за оваа „т.н. хемиска магла.“

Други пријавиле „чудни мириси“ кои предизвикуваат печење во носот, шпекулирајќи дека владата „фрлила микроби врз земјата во форма на магла.“

„Мириса како по многу испукани огномети. Тој сулфурен мирис,“ напиша еден корисник на TikTok, додавајќи: „Ова ме плаши.“

Еден жител од Канзас, пак, изјавил дека видел „огромна количина хемтраили“ во неговата област пред појавата на маглата.