Новак Ѓоковиќ открива дека бил ТРУЕН со олово во хотелот во Мелбурн за време на КОВИД кризата и дека го депортирале затоа што ги поттикнувал луѓето да го поддржуваат антиваксерското движење, а не затоа што бил здравствена закана

Новак Ѓоковиќ изјави дека бил труен со олово за време на неговото задржување во Австралија, пред да биде депортиран во 2022 година.

Светската тениска ѕвезда неодамна го откри трауматичното искуство што го доживеал за време на ковид кризата во Мелбурн во 2022 година.

Тогашниот министер за имиграција, Алекс Хоук, ја одби визата на Ѓоковиќ пред три години поради тоа што не бил целосно вакциниран. Ѓоковиќ беше задржан во хотелот „Парк“ во Мелбурн пет дена додека ја оспоруваше одлуката, пред да биде депортиран.

Во интервју за „GQ“ пред Австралија опен оваа година, шампионот со 24 Грен слем титули изјави дека бил труен за време на престојот во хотелот.

„Имав здравствени проблеми. И сфатив дека во тој хотел во Мелбурн ми даваа храна која ме отру. Кога се вратив во Србија, направив некои анализи. Никогаш досега јавно не сум го кажал ова, но анализите покажаа дека имав многу високо ниво на тешки метали. Имав олово, многу високо ниво на олово и жива“ изјави Ѓоковиќ.

На прашањето дали верува дека храната била причината, Ѓоковиќ одговорил: „Тоа е единственото објаснување.“

Портпарол од австралискиот Оддел за внатрешни работи изјави за „GQ“: „Поради приватност, Одделот не може да коментира индивидуални случаи.“

Ѓоковиќ тврди дека единствената храна што ја јадел била обезбедена од хотелот, а дека неговиот третман се разликувал од останатите спортисти кои биле во карантин, бидејќи бил сместен во „соба како затворска ќелија“.

Тој беше принуден да ја напушти Австралија само неколку дена пред да излезе на терен како бранител на титулата на Австралија опен. Неговото задржување следуваше откако влезе во земјата невакциниран, во време кога на границите се применуваа строги ковид правила.

Визата на Ѓоковиќ беше поништена од австралиската влада поради „јавно здравје и добар ред“, а жалбата против одлуката беше одбиена.

Српската ѕвезда сугерираше дека неговата депортација била мотивирана од стравот на австралиската влада дека тој станал „херој“ на растечкото антиваксерско движење во земјата во тоа време.

„Тоа беше причината поради која ме депортираа од Австралија. Тоа го кажаа тројцата федерални судии на крајот. Нивната пресуда беше дека немаат право да го оспорат дискреционото право на министерот за имиграција. Тоа беше толку политички. Немаше врска со вакцини, ковид или нешто друго. Тоа беше чиста политика. За нив беше помала штета да ме депортираат отколку да ме остават таму“.

Ѓоковиќ инсистира дека неговиот став останал непроменет, наведувајќи дека тој не е „за вакцините, ниту против нив“, и дека луѓето треба да имаат право на избор.

Тој потврди дека не се вакцинирал по депортацијата од Австралија, истакнувајќи дека не чувствува дека му треба вакцина и дека е крајно внимателен во однос на тоа што консумира како професионален спортист.

Ѓоковиќ нагласи дека не претставувал закана за никого при неговото пристигнување во Австралија во 2022 година, објаснувајќи дека „имал антитела“, откако бил позитивен на ковид на 16 декември 2021 година.

Позитивниот тест првично му помогнал на Ѓоковиќ да добие изземање од правилата на Австралија за невакцинирани лица што влегуваат во земјата. Визата на Ѓоковиќ на крајот беше поништена по 10-дневна сага, принудувајќи го да го пропушти тој Австралија опен како бранител на титулата.

Реакции од австралиската влада

Австралискиот премиер, Ентони Албанизе, неодамна ја нарече постапката на поранешната федерална влада кон Ѓоковиќ „запрепастувачка.“

„Тогаш дадов коментари за ова. Ми беше шокантно што во пресрет на Божиќ, Новак Ѓоковиќ беше спречен од тогашната федерална влада да го види својот православен свештеник“ изјави Албанизе пред новинарите.

Ѓоковиќ призна дека се чувствува „трауматизирано“ секој пат кога се враќа во Мелбурн.

„Морам да бидам искрен. Последните неколку пати кога слетав во Австралија, при минување на пасошка контрола и имиграција — чувствувам траума од пред три години“.