Најголемата змија на светот „дебела како автомобилска гума“ откриена во длабочините на Амазонската река

Во почетокот на 2024 година, истражувачите направија неверојатно откритие во Амазонската прашума, кое ги остави сите без зборови. Станува збор за огромно суштество, опишано како „дебело како автомобилска гума“.

Ова суштество, според научникот професор Фрик Вонк, тежело повеќе од 200 килограми. Вонк, заедно со тим од други научници, го сподели ова откритие преку видео што стана вирално на социјалните мрежи.

Се испостави дека станува збор за најголемата змија на светот, откриена во Амазонската прашума. Не е изненадување што оваа вест предизвика огромен интерес.

Колку е голема змијата?

Во видеото, Вонк ја опиша змијата како „масивна“ и „чудовиште“. Тој истакна дека откритието укажува на тоа дека најголемата змија на светот, зелената анаконда, не е само еден вид – туку всушност постојат две различни подвидови.

Научникот објасни: „Заедно со уште 14 научници од девет земји, денес опишавме НОВ вид змија од Амазон. И не е мала – туку огромна змија! Откривме дека зелените анаконди кои живеат во северните делови на Јужна Америка (како Венецуела, Суринам и Француска Гвајана) се сосема различен вид! Иако изгледаат скоро идентично, генетската разлика меѓу нив изнесува 5.5%, што е многу. За споредба, генетската разлика меѓу луѓето и шимпанзата е само 2%.“

Вонк продолжи: „Најголемата анаконда што сум ја видел е токму оваа – дебела како автомобилска гума, долга осум метри и тешка над 200 килограми. Главата ѝ е голема колку мојата! Од восхит до страв, ова е вистинско чудовиште! Претходно имам откриено нов вид, но тоа беше мала змија од Австралија. Сега станува збор за митско и легендарно суштество! Ова дефинитивно е еден од најзначајните моменти во мојата научна кариера. Особено затоа што оваа змија живее во Амазон, место што за мене е како втор дом.“

Холандскиот професор, кој е исто така ТВ-презентер, го искористи ова откритие за да ја нагласи загрозеноста на Амазон поради климатските промени и уништувањето на шумите.

Тој додаде: „Веќе над една петтина од Амазон е уништена – тоа е повеќе од 30 пати површината на Холандија. Опстанокот на овие иконични џиновски змии е нераскинливо поврзан со зачувувањето на нивниот природен дом. Ова истражување нагласува колку е итно да го заштитиме најголемиот тропски дождовен појас на светот.“