Невеста измамена да се омажи за инфлуенсер во наводно лажна церемонија за следбеници — но всушност станувало збор за многу поголема измама

Невестата пристигна — но младоженецот излажал.

Наместо подарок или паричен чек во чест на венчавката, оваа двојка доби поништување на бракот по барање на „разбеснетата“ невеста, која тврди дека мислела оти свадбата е само шега за социјалните мрежи, а не вистински брак.

„Ми кажа дека организира лажна свадба за неговите социјални мрежи. Поточно, за Инстаграм“, објаснувајќи дека младоженецот имал 17.000 следбеници. „Сакаше да го зголеми својот ангажман и да почне да заработува од својата Инстаграм страница.“ – даде изјава таа пред судот.

Според медиумите, ниту невестата, ниту младоженецот, бисексуален маж во триесеттите години од Мелбурн, не смеат да бидат именувани од правни причини.

Судијата Џошуа Вилсон заклучил дека невестата била измамена во текот на „лажната“ свадба во декември 2023 година во Сиднеј, која била дел од план за добивање виза. Како резултат на тоа, судот го поништил бракот.

Неверојатната приказна започнала кога двојката се запознала преку апликација за запознавање во септември 2023 година. Само еден ден подоцна, тие се виделе во црква на првиот состанок.

По три месеци врска, во декември, мажот ја запросил и таа прифатила. Два дена подоцна, тој ја поканил на настан во Сиднеј наречен „бела забава“.

Но, кога пристигнала на местото во бел фустан — кој, како што инсистира, не бил венчаница — била шокирана кога дознала дека нејзиниот партнер всушност организирал свадба.

„Кога стигнав таму и видов дека никој друг не е облечен во бело, го прашав: ‘Што се случува?’“ сведочела таа пред судот, додавајќи дека тој ја убедил дека сé е само шега.

Прифатила да учествува во шегата и изгледала ентузијастично на видеоснимките од церемонијата. Но, таа тврди дека нејзиното однесување било само глума.

„Моравме да се однесуваме така за да изгледа реално,“ објаснила невестата.

Меѓутоа, наскоро открила дека бракот бил вистински и правно валиден, кога младоженецот ја замолил да го додаде неговото име во нејзината апликација за постојан престој во Австралија. Ако прифатела, тоа би му помогнало и нему да добие постојан престој.

„Ми кажа дека не е постојан жител и дека ја организирал венчавката за да си помогне себеси,“ изјавила невестата.

Бесна поради измамата, таа се чувствувала изневерена од самиот почеток.

Таа изјавила дека никогаш не би се омажила без дозвола од своите родители, без венчаница и без вистинска прослава. Од своја страна, младоженецот негирал дека свадбата била организирана за популарност на социјалните мрежи.

Тој сведочел дека веднаш по запознавањето „излегол“ пред невестата како бисексуалец и дека таа го прифатила тоа, по што се преселила во неговиот дом.

Тој потпишал намера за брак на 20 ноември 2023 година — неколку недели пред запросувањето. Но, според CNN, невестата тврди дека никогаш не го видела тој документ.

Младоженецот тврдел дека нивната венчавка требало да биде интимна, а официјалната церемонија планирале да ја направат во нивната татковина. Според него, тие двајцата се согласиле на ова.

Но, судијата Вилсон не ја прифатил неговата верзија.

Тој изјавил дека е нелогично невестата да се омажи за него само два дена по запросувањето и затоа го одобрил поништувањето на бракот.

„Барателката немаше ниту еден член од семејството или пријател на церемонијата. Таа беше религиозна,“ напишал судијата. „Не ми беше јасно зошто би учествувала во граѓанска церемонија, а не во црковна венчавка. Тоа едноставно не ми имаше смисла,“ заклучил тој.