Истражување ги следело однесувањата на деца од градинка и ги анализирало 19 години подоцна – еве што откриле

Секој родител сака неговото дете да има добри оценки во училиште. Но сега знаеме дека социјалниот успех е исто толку важен. Уште од мали нѐ учат дека оценките и тестовите се клучни за успехот во животот. Но едно истражување покажува дека кога децата учат како да комуницираат со другите и како да ги контролираат своите емоции, тоа може да има огромно влијание врз нивниот живот како возрасни. Според ова истражување, децата треба да поминуваат повеќе време во училиште учејќи вакви вештини.

Ова не е некоја хипи-филозофија – туку наука.

Наставниците во градинките ги оценувале децата користејќи дел од алатката наречена „Скала за социјална компетентност“. Тие оценувале изјави како: „Детето добро ги разбира чувствата на другите“ на скала од „воопшто не“, „малку“, „умерено“, „добро“ до „многу добро“.

Истражувачите ги искористиле овие резултати за да им дадат на децата „оценка за социјална компетентност“, која ја зачувале и 19 години подоцна, кога децата наполниле 25 години, повторно ги проучиле и анализирале нивниот животен пат.

Еве што откриле:

1. Оценките се важни, но не поради причините што ги мислевме

Обично мислиме дека ако едно дете има добри оценки, значи дека е паметно, нели? Се знае дека постои врска помеѓу добар успех во средно училиште и повисока заработка во иднина.

Но она што оценките не го покажуваат е колку пати детето соработувало со другар за да реши тежок проблем, барало помош од наставникот или одбило да гледа телевизија за да учи.

Истражувачите велат дека „успехот во училиште зависи и од социјалните и од когнитивните вештини, бидејќи социјалните интеракции, вниманието и самоконтролата влијаат врз подготвеноста за учење“. Со други зборови, децата не успеваат само затоа што се паметни – потребни им се и социјални вештини.

2. Вештините како споделување и соработка се исплаќаат подоцна во животот

Истражувачите сфатиле дека децата кои се добри во комуникацијата со врсниците, подобро ги контролираат своите емоции и успешно решаваат проблеми, имаат поголеми шанси за успешен живот.

И тоа не е само мала поврзаност – резултатите биле навистина силни.

Зголемување од само еден поен на скалата за социјална компетентност значело:

• 54% поголема веројатност да завршат средно училиште,
• двојно поголема шанса да завршат факултет,
• 46% поголема веројатност да имаат стабилна, редовна работа на 25 години.
• Децата кои биле агресивни, краделе играчки или имале чести испади на бес, почесто имале проблеми со законот и злоупотреба на супстанции во подоцнежните години.

Истражувањето не може со сигурност да каже дека лошите или добрите социјални вештини се директна причина за овие исходи, но едно е сигурно – позитивните социјални вештини помагаат.

3. Социјалните вештини можат да се научат – никогаш не е доцна за промена

Истражувачите велат дека одредени социјални вештини, како соработка и споделување, можат да се научат и подобрат.

Не секое дете ќе биде гениј, бидејќи постојат природни разлики во способностите за учење. Но, справувањето со конфликти и дружењето се нешта што секој може да ги усоврши.

И знаеш што? Најчесто, овие однесувања децата ги учат од родителите. Колку повеќе родителите покажуваат љубезност и емпатија, толку подобро ќе се однесуваат и нивните деца.

Што значи сето ова?

Истражувањето има свои ограничувања, бидејќи во голема мера се потпира на мислењата на наставниците. Сепак, резултатите покажуваат јасна слика – социјалните вештини се важни уште од најрана возраст.

Заклучокот? Децата не треба да учат само факти и информации – треба да учат како да се однесуваат со другите и како да ги контролираат сопствените емоции.

Занемарувањето на овие вештини во училиштата може да има сериозни последици во иднина.