Даниел Редклиф се сретна со неговиот каскадер од „Хари Потер“, којшто остана парализиран снимајќи сцена од еден од филмовите

Даниел Редклиф неодамна се сретна со својот долгогодишен дублер- каскадер, Дејвид Холмс, кој во 2009 година остана парализиран од градите надолу по несреќа на сетот за „Хари Потер и Даровите на смртта: Дел 1“.

Холмс, кој беше дублер на Редклиф од првиот филм, претрпе повреди за време на сцена која симулираше експлозија. Несреќата му го промени животот, но врската меѓу двајцата остана цврста. Холмс истакна дека актерот му е „како семејство“.

Пред премиерата на документарецот „David Holmes: The Boy Who Lived“ во 2023 година, Холмс изјави дека со Редклиф „пораснале заедно“.

„Не бев само негов дублер, туку и негов наставник по физичко. Славевме празници заедно, и сега гледам како тој расте како човек“, рече Холмс, додавајќи дека е голема радост да го има Редклиф во животот.

Редклиф, кој беше извршен продуцент на документарецот, го посети Холмс додека беше во Велика Британија. Холмс сподели фотографии на „Инстаграм“, истакнувајќи го задоволството од повторната средба со својот пријател, кој сега има раце полни работа како татко на мало дете.

Освен што зборувале за филмови, телевизија и музика, двајцата имале посета од уште еден нивен пријател, дублерот Марк Мајли, кој го заменуваше Редклиф во последните делови од серијалот. Холмс, кој сè уште е близок со многу од актерите во филмовите, најави дека заедно со Редклиф ќе потпишат примероци од неговата книга кои ќе се аукционираат за добротворни цели.

И покрај предизвиците, Холмс останува инспирација, одржувајќи ги своите врски со екипата од Хари Потер и споделувајќи ја својата приказна со светот.