Најмладата добитничка на лотарија во Велика Британија имаше трагична приказна по освојувањето на 1,9 милиони евра

Изгледа дека оној што рекол „парите не ги решаваат сите проблеми“ навистина знаел што зборува.

Веројатно сите барем еднаш сме сонувале како би изгледал животот ако освоиме џекпот – да дадеме отказ, да си купиме вила и да исчезнеме во залезот на сонцето. Но, не секогаш приказната има среќен крај.

Една личност што најдобро може да предупреди за замките на изненадното богатство е Кели Роџерс, која во 2003 година, на само 16 години, освои неверојатни 1,9 милиони евра на лотарија.

Од богатство до пад – животот на Кели Роџерс

Во тој период, Кели работела во локалниот супермаркет Co-op во Кумбрија за само 4 евра на час и живеела со згрижувачки родители. Нејзината добивка целосно ѝ го променила животот.

Но, 22 години подоцна, судбината на Кели изгледа сосема поинаку – а патот што го изодела бил вистински ролеркостер.

Откако ги добила парите, Кели веднаш започнала да го менува својот живот. Потрошила половина милион за да купи куќи за себе, пријателите и семејството.

Понатаму, наводно потрошила 650,000 евра на облека, тетоважи и патувања, како и на разни естетски операции, вклучително 22.000 евра за зголемување на градите.

Темната страна на богатството

Но, многу брзо по добивката, Кели почнала да го чувствува товарот на своето богатство.

Се нашла опкружена со луѓе кои барале пари од неа – суми што никогаш не ѝ биле вратени.

„Луѓе ми бараа пари за нови коли и јас ги помагав. Бев премногу наивна. Сега разбирам какви биле. Бев искористена поради моите години. Имав многу лажни пријателства. Им давав пари на далечни роднини и на пријатели на пријатели. Позајмував 20.000 фунти овде, 13.000 фунти таму – и никогаш не ми ги враќаа.“ изјавила таа за The Mirror во 2019 година.

Со текот на времето, завршила во банкрот.

„Преку ноќ од безгрижно дете станав возрасен човек. И години подоцна, сè уште ми се потегнува оваа приказна. Често размислувам што ќе помислат родителите на мојот иден партнер или новите пријатели. Сè уште добивам навреди само поради тоа што сум јас.“ рекла таа.

Нов живот и повик за промени

Денес, на 37 години, Кели е мајка на пет деца и го сменила својот живот. Повторно се запишала на училиште и се обучила за негователка.

Таа е гласен поборник за подигнување на минималната возраст за учество во лотарија, тврдејќи дека е доказ колку е опасно да се дозволи деца да освојат толку големи суми пари.

Британската влада подоцна ја промени законската граница – од 16 на 18 години.

Компанијата Camelot, која порано ја водеше Националната лотарија, тврди дека со години ѝ нудела помош на Кели.

„Не ја прифати независната финансиска и правна помош што ѝ ја понудивме. Но, нашиот тим ѝ даваше целосна поддршка и ѝ помагаше во однос на медиумскиот интерес. Ако Кели сака, и понатаму сме тука да ѝ помогнеме“ вели нивниот портпарол.