Зачудувачко откритие: Хаолонг, диносаурусот со кожа каква што досега не е видена

Содржина:

• Haolong dongi – единствениот диносаурус со боцки концентрирани по вратот, грбот и страните
• Скелет долг 2,45 метри открива дека боцките биле и кај младите, но не е сигурно за возрасните
• Научниците не можат со сигурност да кажат за што служеле боцките– изолиција, камуфлажа или одбрана од предатори
• Најверојатно, боцките му служеле како одбранбен механизам против предаторите
• Истражувањето објавено во Nature Ecology & Evolution го покажува светот на диносаурусите како полн со изненадувања кои сè уште ги откриваме

Haolong dongi – единствениот диносаурус со боцки концентрирани по вратот, грбот и страните

Новото суштество доби име Haolong dongi, што значи„бодликав змеј“. Додека повеќето негови игуанодонтски роднини имале лушпеста кожа, Хаолонг изгледа како да носел „крзнен капут“ направен од кожа слична на онаа кај бодликаво прасе.
Боцките биле концентрирани околу вратот, грбот и страните. Се протегале паралелно една со друга и сите биле насочени кон задниот дел на диносаурусот. Повеќето биле мали, долги околу 2 до 3 милиметри, но меѓу нив имало и средни боцки со должина од 5 до 7 милиметри. Неколку биле многу поголеми, при што најдолгата надминувала 44 милиметри.

Скелет долг 2,45 метри открива дека боцките биле и кај младите, но не е сигурно за возрасните

За Хаолонг се знае само од еден единствен примерок – речиси целосен скелет долг 2,45 метри, со извонредно добро зачувана кожа. Интересно е што коските укажуваат дека животното сè уште било младенче кога умрело. Затоа научниците не можат со сигурност да кажат дали боцките ги имале и возрасните единки или тие исчезнувале со растењето.

Научниците не можат со сигурност да кажат за што служеле боцките– изолиција, камуфлажа или одбрана од предатори

Целта на боцките останува мистерија. На прв поглед личат на прото-пердуви, но тие се појавиле многу порано од Хаолонг, кој живеел пред околу 125 милиони години. Можно е да обезбедувале топлинска изолација, бидејќи климатските услови биле студени и други диносауруси во истата средина, како Јутјранус, имале дебел пердувест слој. Меѓутоа, боцките на Хаолонг биле преретки за таква функција. Опцијата ‘визуелен приказ’ или камуфлажа исто така не е докажана, затоа што не се пронајдени пигментски клетки. Ни како сетилни органи не се вклопуваат, како кај некои модерни влекачи – премногу се големи и не се поврзуваат со лушпите како што би требало.

Најверојатно, боцките му служеле како одбранбен механизам против предаторите

Најверојатната работа, според научниците, е дека боцките служеле да ги одвратат предаторите. Хаолонг живеел на територија полна со мали месојадни диносауруси, па ваква одбрана би можела да еволуира под притиок на вакви опасности. Боцките веројатно не биле доволно силни да повредат или убијат напаѓач, но сигурно биле досадни и непријатни – можеле да го натераат предаторот да побара полесен плен.
„Овие одбрани не даваат непробојна заштита од забот и канџите на тероподите, но го прават пленот потежок и побавен за убивање и јадење, со што се намалува шансата за успешен оброк,“ пишуваат истражувачите.

Истражувањето објавено во Nature Ecology & Evolution го покажува светот на диносаурусите како полн со изненадувања кои сè уште ги откриваме

Без разлика на точната улога на необичните боцки, откритието на Хаолонг покажува дека светот на диносаурусите секогаш крие нови и необични животни форми, кои ги менуваат нашите сознанија за еволуцијата на древните суштества. Истражувањето е објавено во престижното научно списание Nature Ecology & Evolution.