Среќа што не им шибна Грујо по една барок фасада: Брутализмот во архитектурата стана тренд на социјалните мрежи и ќе привлече толпи туристи во Скопје

Содржина:

• Брутализмот – бетонски споменици што станаа туристичка атракција по социјалните мрежи
• Скопје по катастрофалниот земјотрес: Брутализмот ја прероди македонската метропола
• Судир околу фасадите: Скандалот „Скопје 2014“ и брутализмот под закана
• Најзначајните бруталистички објекти во Скопје сведочат за културна историја што инспирира светски патници
• Брутализмот не е само во Скопје: Лондон, Ереван, Белград и Париз се врвни дестинации за љубителите на бетон и уникатна архитектура

Брутализмот – бетонски споменици што станаа туристичка атракција по социјалните мрежи

Големите бетонски згради што се издигаа по Втората светска војна не се типична Инстаграм позадина, но тоа не ги спречи туристите да ги бараат токму овие објекти, најчесто во поранешни социјалистички земји. Еден од градовите кои најмногу профитираат од овој тренд е Скопје, главниот град на Македонија.

Скопје по катастрофалниот земјотрес: Брутализмот ја прероди македонската метропола

По разорниот земјотрес во 1963 година, кога 80% од зградите беа уништени, архитекти од целиот свет дојдоа да помогнат при обновата на градот. Така се создаде уникатен микс од бруталистички стилови кои и денес живеат во хармонија. Александра Георгиева, локалец од Скопје, неодамна започна тура за бруталистичка архитектура по принципот „дај колку можеш“, бидејќи сакаше да ја пренесе љубовта кон стилот на туристите. „Во тој период, македонските архитекти имаа огромен придонес за градот,” раскажува Георгиева за Euronews Travel. „Ова е дебатиран архитектонски стил, но дали ви се допаѓа или не, градот буквално се прероди по земјотресот.“

Судир околу фасадите: Скандалот „Скопје 2014“ и брутализмот под закана

Дебатата за брутализмот не е само естетска. Многумина сакаа да менуваат фасадите на овие објекти за да им дадат неокласичен изглед — што и се случуваше за време на проектот „Скопје 2014“. Иако проектот беше прекинат во 2018 година, владата, парламентот и многу други згради околу центарот веќе беа радикално менувани со големи трошоци. Застапниците тврдат дека ова е враќање на градот во неговиот претходен изглед, не уништување на наследството. Александра Георгиева има поинакво мислење: „Мислам дека ја пропуштивме шансата Скопје веднаш по земјотресот да се обнови во неокласичен стил. Во меѓувреме, брутализмот стана еден од најважните стилови на архитектура во градот. Можеби не е најпосакуван, но е автентичен, типичен и токму поради тоа Скопје се издвојува од другите градови.“

Најзначајните бруталистички објекти во Скопје сведочат за културна историја што инспирира светски патници

Турата на Георгиева опфаќа згради како Македонската академија на науките и уметностите, инспирирана од јапонските храмови, Градскиот трговски центар — и денес срце на градското секојдневие, и спектакуларната зграда на Поштата, вистински визуелен хит за љубителите на стилот. Скопје стана магнет за инстаграмџии и авантуристи поради токму овие автентични споменици.

Брутализмот не е само во Скопје: Лондон, Ереван, Белград и Париз се врвни дестинации за љубителите на бетон и уникатна архитектура

Барбикан Центарот во Лондон е еден од најпознатите европски примери на бруталистичка архитектура, а таму може да резервирате водена тура од 90 минути. Ереван, главниот град на Ерменија, исто така станува горешта дестинација, особено со спектакуларниот Каскаден комплекс и познатата радио-оптичка опсерваторија до која се стигнува за два часа возење од градот. Други водечки градови за овој тренд се Белград и Париз.