Хрватска има море, но секој трет Хрват не може да си дозволи седум дена одмор: Јадранот станува луксуз и за домашните

Содржина:

• Морето е тука, но цените се сè повисоки
• Хрватскиот Јадран одамна не важи за евтина дестинација
• Туристите доаѓаат во милиони, домашните го пресметуваат секое евро
• Секој трет не може да си дозволи ни седум дена
• Туристичка земја во која одморот станува луксуз

Морето е тука, но цените се сè повисоки

Проблемот станува уште поочигледен кога ќе се погледне движењето на цените во Хрватска.
Во мај 2025 година цените во рестораните и хотелите биле дури 9 отсто повисоки отколку во истиот месец претходната година, покажуваат официјалните податоци на хрватскиот Државен завод за статистика. Храната и безалкохолните пијалаци во истиот период поскапеле за 5,7 отсто.
Трендот продолжил и непосредно пред главната летна сезона. Во јуни рестораните и хотелите биле за 8,5 отсто поскапи во споредба со јуни 2024 година, додека храната и безалкохолните пијалаци поскапеле за 5,8 отсто.
Тоа се токму трошоците кои најмногу го погодуваат семејниот буџет за летување – сместување, храна, ресторан и секојдневни трошоци.

Хрватскиот Јадран одамна не важи за евтина дестинација

Хрватска со години важеше за поевтина алтернатива на Италија, Франција или Шпанија, но таа репутација постепено исчезнува.
Особено во туристичките места на Јадранот, цените во рестораните, кафулињата и сместувачките капацитети во текот на сезоната се приспособени на огромниот број странски гости. За турист со значително повисока плата од Германија, Австрија или Холандија тие можеби се прифатливи, но за домашно семејство истата сметка изгледа сосема поинаку.
Токму затоа во Хрватска во последните години сè почесто се отвора дебатата дали земјата станала прескапа не само за дел од странските туристи, туку пред сè за сопствените граѓани.

Туристите доаѓаат во милиони, домашните го пресметуваат секое евро

Парадоксот е што хрватскиот туризам истовремено бележи огромни бројки.
Во 2025 година во комерцијалните сместувачки капацитети биле регистрирани 20,7 милиони туристички пристигнувања и 94,8 милиони ноќевања. Огромното мнозинство од ноќевањата – повеќе од 90 отсто – ги оствариле странски туристи.
Така, додека милиони Германци, Словенци, Австријци, Италијанци и други странски гости секоја година пристигнуваат на хрватскиот Јадран, дел од луѓето кои живеат во самата Хрватска не можат да издвојат доволно пари за една недела одмор.

Секој трет не може да си дозволи ни седум дена

Секако, податокот дека 33 отсто од Хрватите не можат да си дозволат еднонеделен одмор не значи дека сите останати летуваат без финансиски грижи, ниту дека сите би избрале токму хрватско море.
Но, бројката добро покажува колку годишниот одмор станал сериозна ставкака во домашниот буџет.
Уште посликовит е податокот дека во текот на 2025 година околу 43 отсто од жителите на Хрватска на возраст од 15 години нагоре воопшто не биле на приватно патување со ноќевање.
Меѓу оние кои не патувале, најчесто наведената причина била недостатокот на пари – 41,7 отсто од нив рекле дека финансиските причини ги спречиле да патуваат.

Туристичка земја во која одморот станува луксуз

Хрватска така се наоѓа во необична ситуација. Од една страна, туризмот е еден од нејзините најважни економски сектори, Јадранот секое лето е преполн со гости, а најпознатите крајбрежни места функционираат како меѓународни туристички центри.
Од друга страна, растот на цените во сместувањето, рестораните и храната значи дека дел од домашното население сè потешко може да го следи стандардот на потрошувачка што го диктира туристичкиот пазар.
Морето за Хрватите е на неколку часа возење, но патот до него не е најголемиот проблем. Треба да се платат сместувањето, храната, рестораните, лежалките, паркингот и сите останати трошоци што доаѓаат со една недела на Јадранот.
И токму тука лежи парадоксот: една од најпознатите туристички земји во Европа има море на сопствената територија, а сепак секој трет нејзин жител не може финансиски да си дозволи ни седум дена годишен одмор.