Политички рецепт: Македонски ролат од лоповлук на традиционален начин

Домашен ролат од лоповлук

Потребно е:

• 4 милиони огорчени граѓани
• неколку профитабилни фабрики
• стотици илјади работници
• малку непотизам и лични интереси
• одредена доза безобразлук од меѓународната заедница

Подготовка:

Граѓаните поделете ги на три одделни дела и варете ги неколку години во одделни садови. Малку исперете им го мозокот, а по потреба зачинете ги со омраза и национализам. При варењето внимавајте да не претечат, па садовите цврсто затворете ги.

Во друг сад фабриките убаво исчистете ги и „излупете ги“, за да им се намали калориската вредност, која е штетна. Пред тоа, фабриките треба добро да се маринираат во лоповлук, криминал и свеж домашен интерес.

Содржината од сите три садови соединете ја и добро измешајте, а потоа благо зачинете ја со интересите на меѓународната заедница.

На послужавник наредете ги исчистените фабрики, наполнете ги со содржината од садот и завиткајте ги во „општо добро и светла иднина“.

Со ова јадење ви препорачуваме Дијазепам, Лексилиум, средства против чир и висок крвен притисок.

За мерките на претпазливост и контраиндикациите, посоветувајте се со пратеникот за кого сте гласале!