Ако утре избувне војна, дали сте подготвени? Жена со бункер од 365.000 евра открива како да го подготвите семејството
Роуан Мекензи од сојузната држава Мисури, Американка која со години беше мета на потсмев поради својата опседнатост со подготовка за апокалипса, денес вели дека сè повеќе луѓе ѝ бараат совети како да се заштитат поради ескалацијата на геополитичките тензии низ светот.
Таа изгради домашен бункер вреден над 315.000 фунти, односно околу 365.000 евра, со залихи за вонредни ситуации. Според неа, во случај на воена криза или глобален конфликт, едно четиричлено семејство треба да има почетен фонд од најмалку 5.000 фунти, односно околу 5.800 евра.
„Секогаш си го поставувам прашањето: ако утре се случи катастрофа и не можам да купам ништо цели седум дена, колку ќе биде безбедно и снабдено моето семејство? За да започнете, не ви треба скап подземен бункер, туку јасен и реален план“, нагласува Роуан.
По 1.160 евра по човек за три недели преживување
Објаснувајќи ја потребата од паричен фонд, Роуан посочува дека за набавка на храна и основни средства се потребни приближно 1.000 фунти по член на семејството, односно околу 1.160 евра.
Со правилно рационализирање, таа сума треба да обезбеди опстанок од околу три недели. Во неа се вклучени и трошоците за пренослив ранец за итна евакуација, таканаречен „bug-out bag“, кој содржи основни намирници за првите 72 часа.
Ориз, грав, филтер за вода и радио на батерии, но не на едно исто место
Покрај готовината, Роуан состави список на задолжителни работи што секое семејство треба да ги има дома:
– алтернативни извори на светлина и енергија, како батериски ламби, фенери, полначи за батерии и уреди за готвење на гас;
– трајна храна како ориз, грав и конзерви за најмалку седум дена по лице;
– филтри за прочистување вода;
– основни лекови;
– ќебиња;
– радио на батерии за следење на официјалните вести.
Таа истовремено предупредува на најчестите грешки што луѓето ги прават кога создаваат залихи. Првата е купувањето храна што семејството инаку никогаш не ја јаде, што во кризни моменти создава дополнителен стрес. Втората е складирањето храна без обезбедено доволно количество вода, како и купувањето сложена опрема што никогаш претходно не е тестирана во пракса.
„Неотпакуван филтер за вода, камперско решо или генератор нема да ви помогнат ако не знаете како да ги користите во темница. Исто така, никогаш не ги чувајте сите залихи на едно исто место поради ризик од пожар или поплава, и најважно од сè — никому не кажувајте каде и колку залихи имате. Во вистинска вонредна состојба, секој гледа единствено да се спаси себеси“, предупредува Роуан.
Коментирај анонимно