„Се залетав по буцкаст бизснимен и поради него останав без стан и со кредит на грб: Дури кога го видов на суд, почна да се расплетува клопчето“

Содржина:

• Осум години и два месеци строг затвор за човекот што патувал низ цела Русија
• Прекарот дојде од разликата меѓу неговиот изглед и бајките што ги раскажувал
• На првите состаноци доаѓал со скапи изнајмени автомобили и личен возач
• Кога ќе ги добиел парите, исчезнувал без трага преку ноќ
• Алина Миленаја останала без трособен стан, автомобил и со кредит што сама го отплаќа
• Во обвинението стојат 24 жени, полицијата проценува најмалку 35
• На суд паѓал на колена и ветувал дека „ќе живее на скалите пред полициската станица“
• Формално ја признал вината, но жените не виделе искрено каење

Осум години и два месеци строг затвор за човекот што патувал низ цела Русија

Деновиве во Санкт Петербург беше изречена пресудата за човекот кого руските медиуми го нарекоа „дебелиот Казанова“. Фролов десет години се запознавал со жени преку апликации за средби, се претставувал како успешен претприемач, а всушност бил суров измамник. Судот го осуди на осум години и два месеци затвор со строг режим и му наложи на оштетените жени да им исплати отштета од над 320.000 евра.

Прекарот дојде од разликата меѓу неговиот изглед и бајките што ги раскажувал

Неговиот физички изглед бил сосема просечен. Истражителите отворено признаваат дека тајната не била во некаква неодолива харизма, туку во патолошка лукавост и способност безгрешно да процени што точно ѝ е потребно на една жена уморна од осаменост. Од 2013 до 2023 година постојано се селел низ Русија – од Петербург и Москва, преку Вороњеж, сѐ до Владимир. Никаде не се задржувал долго, не отворал сметки на свое име, не стекнувал пријатели и постојано менувал пасоши, телефони, регистарски таблички и платежни картички. Го нарекувале „патолошки среќник“ затоа што зад себе не оставал дигитални ниту физички траги според кои полицијата би можела лесно да го лоцира.

На првите состаноци доаѓал со скапи изнајмени автомобили и личен возач

Дмитриј ги запознавал своите жртви преку популарни апликации за запознавање. Се претставувал како осамен бизнисмен, говорел дека бара сериозна врска и дека сонува за топол семеен дом. Клучот до женското срце го наоѓал преку покажување грижа, особено кон нивните деца. Тоа секогаш функционирало непогрешливо: самохраните мајки, исцрпени од осаменоста, во него гледале токму таков „сигурен и грижлив маж“ каков што цел живот го чекале.

Кога ќе ги добиел парите, исчезнувал без трага преку ноќ

Потоа започнувал главниот дел од измамата. Барал пари – за наводно купување нов автомобил, за изградба на заедничка семејна куќа или за итна инвестиција во заеднички бизнис. Вљубените жени му верувале без резерва. Некои препишувале цели станови на негово име, некои ги продавале сопствените возила, а некои подигнувале огромни кредити од банките.

Алина Миленаја останала без трособен стан, автомобил и со кредит што сама го отплаќа

Таа е веројатно најпознатата жртва во овој судски процес и стана препознатлив симбол на судењето. По завршувањето на рочиштето, со иронија изјави: „Преживеав толку многу тешки емоции за сето ова време додека траеше потрагата и истрагата, што сега веќе не чувствувам силна омраза кон Фролов. Напротив, му посакувам во затворот да си го подобри здравјето и конечно да ослабе.“ На суд побара оштета од 58.000 евра и, судејќи според пресудата, нејзиното барање е во целост пресметано во вкупниот износ за надомест на штетата.

Во обвинението стојат 24 жени, полицијата проценува најмалку 35

Бројките во овој случај се застрашувачки: официјално, од измамените жени „дебеличкиот Казанова“ извлекол над 320.000 евра. Сепак, инспекторите се свесни дека реалните бројки се далеку поголеми. Многу жени никогаш не го пријавиле измамникот во полиција поради срам од осуда од околината. Други сакале што побрзо да ја заборават срамната „љубовна епизода“ со мажот кому поради слатки зборови и малку лажно внимание му предале сѐ што поседувале во животот. Според проценката на заменик-началникот на полицијата Александар Гудков, за десет години Дмитриј на ваков начин измамил барем 35 жени. Руските медиуми одат и чекор понатаму, тврдејќи дека вистинскиот број на жртви се мери во стотици.

На суд паѓал на колена и ветувал дека „ќе живее на скалите пред полициската станица“

Фролов за време на судскиот процес се однесувал мошне бизарно. На почетокот се обидувал да го претвори судењето во евтин циркус – паѓал на колена, плачел и молел да го пуштат од притвор, па дури и се фалел дека лично му пишал на шефот на рускиот Истражен комитет Александар Бастрикин да го преземе неговиот случај. Обвинителот ладнокрвно му одговорил: „Дмитриј, вие само зборувате во празно“. На изрекувањето на пресудата стоел свртен со грб кон судницата, криејќи го лицето под маска и капа, а на прашањето од каде планира да ги најде парите за да им ги врати на жртвите, дрско одбил да одговори.

Формално ја признал вината, но жените не виделе искрено каење

Пред судиите изјавил дека „самиот ѝ се предал на полицијата затоа што се изморил од постојано бегство и живот под туѓи лажни имиња“. Според сведоштвата, во притворот дури започнал да пишува и книга за своите измамнички авантури. Жените што присуствуваа на изрекувањето на пресудата тивко се насмевнуваа – некои славеа победа што предаторот конечно заврши зад решетки, додека други само со олеснување воздивнаа што нивните имиња не испливаа јавно пред очите на јавноста.