Стоп за европското ѓубре – ЕУ од денеска стави целосно вето за извоз на пластичен отпад во Македонија

Од денеска, 21 ноември, Европската Унија воведува строга забрана за извоз на пластичен отпад кон Македонија и кон останатите земји што не се полноправни членки на Организацијата за економска соработка и развој (ОЕЦД).
Мерката ќе важи најмалку до 21 мај 2029 година и го опфаќа дури и чистиот, неопасен пластичен отпад наменет за секундарна преработка и рециклирање.
Со тоа европските фабрики и компании повеќе нема да можат легално да испраќаат бали со пластичен отпад во Македонија, дури и кога домашните погони тврдат дека истиот се увезува исклучиво како суровина за рециклажа.

Стоп за европското ѓубре - ЕУ од денеска стави целосно вето за извоз на пластичен отпад во Македонија

323,5 тони пластичен отпад во 2024 година пристигнале како пријавен извоз од ЕУ

Според официјалните податоци на Светската банка, земјите членки на ЕУ во 2024 година пријавиле извоз во Македонија во вредност од околу 46.400 долари.
Најголемите количини доаѓале од соседните земји Грција и Хрватска, додека целосните податоци за обемот на пратките во текот на 2026 година сè уште не се финализирани.
Европската комисија образложи дека главната цел на забраната е да се спречи отпадот создаден во богатите западни земји да предизвикува еколошки катастрофи, загадување на почвата и сериозни здравствени ризици во помалку развиените држави.
„Еден од нашите апсолутни приоритети е конечно да ставиме крај на глобалното загадување со пластика“, изјави европската комесарка за животна средина Џесика Росвал, нагласувајќи ја неопходноста од нов меѓународен договор за драстично намалување на отпадот.

323,5 тони пластичен отпад во 2024 година пристигнале како пријавен извоз од ЕУ

Македонија барала продолжување за хартија, стакло, метали и органски отпад, но не и за пластика

Македонските власти претходно испратиле официјално барање до Европската комисија за продолжување на приемот на одредени специфични категории неопасен отпад, меѓу кои стара хартија, стакло, отпадни метали и органски отпад. Пластичниот отпад воопшто не бил дел од ова државно барање.
За останатите категории од мај 2027 година ќе стапат на сила дополнителни построги ограничувања, со исклучиво одобрени поединечни исклучоци.
Дури по 21 мај 2029 година, Македонија ќе има теоретска шанса да аплицира за повторна дозвола за прием на пластичен отпад од земјите на ЕУ, но само доколку со цврсти меѓународни сертификати докаже дека поседува современи индустриски капацитети за негово целосно и еколошки безбедно третирање.
Сепак, властите во Брисел нагласуваат дека таквото одобрение во никој случај нема да се дава автоматски.
Европската одлука строго го забранува извозот од самата Унија, но не претставува автоматска забрана за македонските компании доколку одлучат да увезуваат пластичен отпад од други трети земји надвор од ЕУ блокот.

Македонија барала продолжување за хартија, стакло, метали и органски отпад, но не и за пластика

Коментирај анонимно

Вашата адреса за е-пошта нема да биде објавена. Задолжителните полиња се означени со *