Најголемите типчиња на светот живеат во едно забутано авганистанско село – сите момци се за на модна писта

Приказната за оваа несекојдневна група млади луѓе на светската јавност ѝ ја приближи авганистанско-американскиот визуелен уметник и фотограф Даниел Маликјар. Патувајќи низ Авганистан, низ најтешко достапните планински предели, тој сакал да го документира секојдневниот живот надвор од воените извештаи.
Таму, далеку од големите патишта и уште подалеку од модните центри, наишол на група момчиња кои развиле сопствен, целосно автономен и автентичен моден израз.

Најголемите типчиња на светот живеат во едно забутано авганистанско село - сите момци се за на модна писта

Сурма околу очите, кана на ноктите и капи со свежо цвеќе

„Во нивното зафрлено село живеат неколку илјади луѓе, но само мала група момчиња и млади луѓе се облекуваат на ваков начин. Тие користат минерален прав наречен сурма за оцртување на очите, ги бојадисуваат ноктите со природна кана, носат богата извезена облека во силни бои, како и рачно изработени капи украсени со свежо цвеќе и украсни шноли. За нив тоа е сосема природен дел од секојдневието, при што секое момче внесува сопствен печат и карактер во својот стил“, раскажува фотографот.
Нивниот препознатлив визуелен печат претставува спој од народната носија на предците, природната козметика и рачно изработените аксесоари. Во секоја комбинација има нешто наследено, нешто измислено и нешто лично.

Сурма околу очите, кана на ноктите и капи со свежо цвеќе

Без ТикТок, Инстаграм и модни списанија, портретите завршија во фотомонографијата „Afghanistan“

Она што го прави нивниот стил толку впечатлив во современото дигитално доба е фактот дека се развил во речиси целосна изолација од глобалните трендови и поп-културата. Без пристап до интернет мрежи, овие момчиња се потпреле на фантазијата, природата што ги опкружува и вековните локални занаети.
Маликјар ги вклучил нивните портрети во својата фотомонографија насловена „Afghanistan“, по што фотографиите предизвикаа огромно воодушевување на глобално ниво.
„Се враќав во селото неколку пати за да поминувам време со нив, да дознаам повеќе за нивното секојдневие и да го документирам нивниот личен стил. Колку подобро ги запознавав, толку повеќе ја ценев индивидуалноста зад секоја поединечна фотографија. Нивната приказна е силен потсетник дека желбата за себеизразување не познава никакви географски граници. Без разлика од каде потекнуваме или колку нашите животи се разликуваат, потребата да покажеме кои сме е универзална карактеристика на сите луѓе“, истакнува Маликјар.

Без ТикТок, Инстаграм и модни списанија, портретите завршија во фотомонографијата „Afghanistan“

Традицијата на сурмата има милениумска историја, а нивната мода нема ниту еден светски бренд

Црниот минерален прав се нанесува околу очите, а токму по него оваа локална супкултура го добила своето неформално име. Исцртувањето на очите со сурма во Авганистан и низ Јужна Азија има милениумска традиција. Ја користат мажи, жени и деца, како од естетски причини, така и поради вековното верување дека ги штити очите од агресивното планинско сонце, ветровите, прашината и инфекциите.
Овие необични момчиња ги бојадисуваат ноктите со природна кана, што на нивните дланки им дава карактеристични портокалово-црвеникави тонови. Посебно се впечатливи нивните капи, кои сами ги шијат или дотеруваат, украсувајќи ги со свежи диви цветови, бисерни мониста и шарени детали пронајдени во природата.
Во земја чија слика во глобалните медиуми со децении беше сведена на воени судири, рестриктивни закони и сиромаштија, појавата на овие момчиња е доказ за длабоко вкоренетата човечка потреба за игра, естетика, убавина и слобода.
Без ниту едно парче облека купено од познат светски бренд и без можност за шопинг, овие млади авганистански момчиња покажаа дека вистинската креативност никогаш не зависи од парите, туку од слободата на духот што успева да пронајде бои и светлина дури и во најсуровото опкружување.

Традицијата на сурмата има милениумска историја, а нивната мода нема ниту еден светски бренд

Коментирај анонимно

Вашата адреса за е-пошта нема да биде објавена. Задолжителните полиња се означени со *