Алармантни знаци дека главоболката што ја чувствувате може да биде симптом на сериозно заболување
Главоболките се честа појава и обично не се причина за загриженост, но во ретки случаи можат да бидат знак за опасна состојба. Доктор Ахмед, специјалист по итна медицина од Велика Британија, стана вирален на TikTok откако ги сподели осумте видови главоболки што бараат итна лекарска помош.
Најопасни главоболки
Најстрашна е „гром главоболката“ – ненадејна, силна и заслепувачка болка што многумина ја опишуваат како најлошата главоболка во животот. Таа може да укажува на крварење во мозокот, најчесто предизвикано од пукање на крвен сад, и бара итна медицинска интервенција.
Вториот алармантен симптом се симптоми слични на мозочен удар, како што се слабост на едната страна од телото, опуштено лице, губење вид или слух, конфузија или потешкотии со говорот. Иако мозочните удари често не се болни, понекогаш се појавуваат со главоболка и не смеат да се игнорираат.
Трет знак е главоболка придружена со треска и болка во вратот, што може да укажува на енцефалитис или менингитис – сериозни инфекции што предизвикуваат воспаление на мозокот и може да доведат до напади или забуна.
Повраќање и главоболка при бременост
Повраќање по повреда на главата е уште еден алармантен симптом кој може да укаже на внатрешно крварење, односно хеморагија, што може да предизвика мозочен удар или трајно оштетување на мозокот.
Доктор Ахмед предупредува и на главоболка придружена со болка во очите или губење на видот, што може да значи акутен глауком – состојба со зголемен притисок во окото што го оштетува оптичкиот нерв.
Кај бремените жени, особено во второто тримесечје, главоболката може да биде симптом на прееклампсија – сериозно заболување со покачен крвен притисок, што претставува ризик и за мајката и за бебето. Нелекувана, може да предизвика мозочен удар, напади, оштетување на органи и ретардација на растот на фетусот.
Не ги игнорирајте знаците!
Друг сериозен знак е главоболка што се влошува при виткање нанапред или кашлање, што може да значи прекумерна количина течност во мозокот – состојба што предизвикува зголемен притисок и трајни оштетувања.
На крај, упорна главоболка што трае со недели без подобрување, и не реагира на лекови, може да биде последица на стрес, хронична мигрена – или дури тумор на мозокот. Со повеќе од 10 милиони луѓе во Велика Британија кои редовно имаат главоболки, доктор Ахмед советува секој со некој од овие осум симптоми веднаш да побара медицинска помош.
Коментирај анонимно