Апокалиптични снимки гo прикажуваат размерот на пожарите во Лос Анџелес: 30.000 луѓе евакуирани од своите домови

Разорните пожари што ја зафатија Калифорнија принудија десетици илјади луѓе да ги напуштат своите домови, додека пламените уништуваат куќи и горат големи површини.

Гувернерот на сојузната држава прогласи вонредна состојба откако пожарот, поттикнат од силни ветрови, се прошири и прерасна во огромен пожар.

Има неколку активни пожари, меѓу кои и оној што помина низ областа Пасифик Пелисејдс во Лос Анџелес, каде што се наоѓаат куќи на познати личности, како и пожар што избувна завчера (7 јануари) во близина на природен резерват на североисток од градот.

Последниот пожар се прошири толку брзо што жителите на блискиот дом за стари лица мораа да бидат извлечени во инвалидски колички и болнички кревети на паркинг чекајќи да бидат евакуирани.

Некои патишта беа блокирани од автомобили на луѓе кои се обидуваа да избегаат, но ги напуштија своите возила и побегнаа пеш. За да се расчисти патот за итните служби, беше донесен булдожер за да ги помести напуштените возила.

Една жена, која останала заглавена меѓу Булевар Сансет и Пелисејдс Драјв, изјавила за LA Times дека пожарот избувнал во близина на кафулето „Старбакс“ на патот, додека полицијата трчала низ улицата и им викала на возачите: „Напуштете ги автомобилите и трчајте за вашите животи!“

Трет пожар, кој започнал околу 22:30 часот локално време (6:30 часот по Гринич), доведе до нови евакуации од областа Силмар, која се наоѓа најсеверно во Лос Анџелес.

Противпожарната служба на Лос Анџелес побара помош од пожарникари кои не биле на должност за да помогнат во справувањето со огнената стихија.

Силните ветрови, кои ги разнесуваат пламените, исто така создадоа опасност за авионите за гаснење пожар, што дополнително ги отежнува напорите за сузбивање или контрола на пожарот.

Ветровите, кои понекогаш достигнуваат брзина до 100 милји на час, оставија илјадници домови во областа без струја, а околу 15.000 луѓе во Јужна Калифорнија останаа без електрична енергија, бидејќи истата беше исклучена за да се намали ризикот од нови пожари.

Според официјални лица во Калифорнија, наредба за евакуација добиле околу 30.000 луѓе поради пожарот во Пасифик Пелисејдс, а околу 13.000 објекти се под закана.

Многу луѓе споделуваат снимки од пожарите во Лос Анџелес, прикажувајќи дрвја и објекти во пламен, додека луѓето бегаат за своите животи, носејќи само она што можат да го понесат.

Снимки направени на автопатот Пасифик Коуст го прикажуваат обемот на уништување – куќи и згради целосно изгорени во пламените.

„Не можеме да кажеме дека сме надвор од опасност“, изјави гувернерот на Калифорнија, Гевин Њусом, завчера (7 јануари).

Многу делови на Калифорнија, каде што се прошири пожарот, долго време немаат забележано значителни врнежи, а напорите за гаснење на пожарите продолжуваат.

Доколку сакате добра акција или пак забегани и жестоки случки само за најхрабрите читатели, тогаш посетете го каналот Жестоко. Предупредување: Содржините може да ве вознемират!