Авиокомпанија објави специјален лет со мистериозна дестинација – се пријавија над 1.000 луѓе за неколку минути

Дали некогаш сте размислувале само да спакувате торба и да фатите лет без да ја знаете дестинацијата?

„Scandinavian Airlines“, авиопревозник со седиште во Шведска, неодамна објави можност за членовите на својата програма за лојалност „EuroBonus“ да резервираат искуство со лет што го нарекуваат „Непозната дестинација“.

Во соопштението за печатот, авиокомпанијата вели дека „во рок од неколку минути“ по објавувањето на 12 февруари, над 1.000 членови се пријавиле за мистериозниот лет. Регистрацијата завршила 24 часа подоцна, а избраните за патувањето имаа дополнителни 24 часа да го потврдат своето место во авионот и да извршат уплата.

Авиокомпанијата повеќе не прифаќа резервации, според „Travel + Leisure“. Авионот ќе лета од Копенхаген, Данска, на 5 април и ќе се врати во истиот град на 8 април.
Според „The ​​Street“, има листа на чекање за секој што се пријавил, но не добил место. Тие ќе имаат шанса да се искачат на листата и можеби дури и да добијат посакувано место ако некој откаже.

Единствената трага што патниците ќе ја добијат пред да полетаат е дека летот ќе трае неколку часа. Дестинацијата ќе биде објавена во одреден момент од летот. Како што се наближува датумот на мистериозниот лет, оние со потврдено место ќе добијат насоки од „Scandinavian Airlines“ за тоа што да пакуваат.

„Можноста да тргнете на авантуристичко и мистериозно патување со колегите ентузијасти, да пронајдете нови врски и пријателства на патот, е навистина возбудливо“, рече Пол Верхаген, EVP и главен комерцијален директор во „Scandinavian Airlines“, во соопштението за печатот.

„Scandinavian Airlines“ не е првата авиокомпанија која прави вакви мистериозни патувања.

„Луфтханза“ моментално им нуди на патниците програма наречена „Изненадување на Луфтханза“, каде што можете да го изберете вашиот домашен аеродром и општа тема за видот на одмор што го барате. Откако ќе се резервира вашиот билет, авиокомпанијата ја открива дестинацијата и таа не може да се промени или откаже.

Во 2023 година, „Wizz Air“, нискобуџетна авиокомпанија, направи мистериозен лет од Венеција со кој авион полн со патници отиде во Саудиска Арабија на неколку дена.