Биохакерот Брајан Џонсон тврди: „Има една работа што целосно ќе ви го промени здравјето, а е сосема бесплатна!”

Брајан Џонсон, 47-годишниот биохакер од Јута, САД, троши годишно 2 милиони долари за да ја врати својата биолошка возраст, но тврди дека постои едноставен и бесплатен начин секој да го подобри своето здравје.

Џонсон, кој се нарекува „најздрав човек во светот“, ја започнал својата мисија за здравје, позната како „Проект Блупринт“, откако неговото здравје се влошило во 2020 година. Тој тогаш почнал да ја следи состојбата на сите 70 органи во своето тело со цел да ја врати биолошката возраст. Неговата рутина вклучува строга исхрана, десетици суплементи и постојан медицински надзор, а неговата приказна е претставена во документарниот филм на „Netflix” „Не умирај: Човекот кој сака да живее засекогаш“.

Џонсон открива дека неговата страст за подобрување на светот започнала кога имал 21 година како мисионер во Еквадор, каде што бил сведок на екстремна сиромаштија. Тој ја поставил целта да заработи многу пари до својата 30-та година, што го постигнал со продажбата на својата компанија „Braintree Venmo” на „PayPal” за 800 милиони долари во 2013 година.

Но, патот не бил лесен – тој се борел со депресија, развод и напуштање на својата религија, што го поттикнало да инвестира 100 милиони долари во синтетичка биологија, геномика и нанотехнологија.

Сепак, за оние кои немаат ресурси за слични инвестиции, Џонсон препорачува бесплатен метод: подобар сон.

„Сонот е професионална активност,“ вели тој. „Треба да го сфатите со сериозност, како својата работа – да се придржувате до рутина, да бидете дисциплинирани и горди на тоа“.

Џонсон предлага воведување на рутина за релаксација, која подразбира 30 до 60 минути без екран и работа, како начин за смирување пред спиење. Според него, добриот сон е „најмоќниот лек што постои за секого“.