Четири лица го загубија животот во страотна сообраќајна несреќа на „Тесла“ возило, откако удрило во ограда и се запалилo

Во трагичен инцидент на 24 октомври, четири лица го загубија животот кога нивниот „Tesla Model Y“ удри во ограда и се запали. Единствената преживеана, млада жена, била извлечена од возилото благодарение на херојскиот потег на Рик Харпер, кој ја спасил со разбивање на прозорецот со метален столб.

Жената тврди дека не можела да ги отвори вратите одвнатре, бидејќи „Tesla“ возилата имаат електронски рачки кои се активираат со притискање на копче. Меѓутоа, во случај на прекин на електричната енергија, како што се случува при несреќи, овие рачки може да престанат да функционираат, оставајќи ги патниците без можност да ги отворат вратите. Иако има мануелен начин за отварање, овој метод не е доволно познат, а паниката што се јавува при несреќа дополнително ја отежнува можноста за користење на оваа опција.

Несреќата се случила во Торонто, каде „Tesla“ возилото се движело со голема брзина пред да удри во оградата и да се запали. Полицијата сè уште ја истражува точната причина за инцидентот. „Tesla“ гордо тврди дека возилата се „дизајнирани за безбедност“, но по несреќата, безбедносни експерти истакнаа дека мануелниот механизам за отварање на вратите не е широко познат меѓу возачите, што може да ги остави патниците во безизлезна ситуација при несреќа.

Притоа, истражувањата покажуваат дека во случај на паника или дезориентација, како што е вообичаено при вакви инциденти, може да биде тешко да се најде и користи овој мануелен механизам.

Според податоците од Националната агенција за безбедност на патиштата во САД, во тек се девет истраги поврзани со моделот „Tesla Model Y“, од кои некои вклучуваат проблеми со неочекувано активирање на кочниците или ненадејно забрзување. Овој трагичен инцидент повторно ја отвори дебатата за безбедносните карактеристики на електричните возила и за неопходноста на подобра обука и информирање на корисниците за вонредните мерки во случај на несреќа.