Човек стана светски шампион во составување зборови на шпански, 9 години по победата на француски. Необичноста? Тој не зборува НИТУ ЕДЕН од овие јазици

Еден човек стана познат преку ноќ, по втор пат, откако го освои Светскиот шампионат во „Скрабл“ на шпански јазик – девет години по неговата победа на францускиот шампионат.

Необичноста? Тој доаѓа од Нов Зеланд и не зборува ниту еден од овие јазици.

Најџел Ричардс е човекот за кој сите зборуваат, откако ја освои титулата на турнирот во 2024 година, одржан во Гранада, Шпанија, во ноември.

Според „Ројтерс“, тој триумфирал со своите неверојатни лингвистички способности, победувајќи многу натпреварувачи на кои шпанскиот им е мајчин јазик.

Победа над 145 противници

Ричардс импресивно победи повеќе од 145 натпреварувачи од целиот свет, вклучувајќи земји како Аргентина, Колумбија, Шпанија и Венецуела. Според Инстаграм страницата на Federación Internacional de Léxico en Español, тој остварил неверојатна низа од 22 последователни победи.

Бенџамин Олаизола, кој изгубил од Ричардс во финалето, изјавил за шпанското радио „La Cadena SER“: „Ова е неверојатно понижување.“

Тој исто така го опишал Ричардс како „надарен човек со специфични способности“.

Објаснувајќи го начинот на игра на Ричардс, Олаизола додал: „Имаше потег што беше најочигледен, оној кој компјутер би го предложил, но тој не го искористи.“

„Тајгер Вудс“ на „Скрабл“

Во заедницата, Ричардс е толку познат што го добил прекарот „Тајгер Вудс на Скрабл“.

И тоа не е без причина – покрај неговите две титули на светските шампионати, тој е рангиран како број 1 од Светската асоцијација за играчи на „Скрабл“ на англиски јазик (WESPA), со речиси 200 турнири освоени во кариерата.

Една од неговите најпознати победи е шампионатот на француски јазик во 2015 година, кога изјавил дека знае само „Bonjour“ на јазикот.

Според неговата пријателка Лиз Фагерлунд, сè што направил било тоа што го научил францускиот речник за „Скрабл“ – и тоа за само девет недели.

Речникот содржел скоро 400.000 зборови.

„Можеби е едноставно поинаку „наштиман“. Тој не ги учи зборовите еден по еден. Може да погледне страница полна со зборови и да ги впие сите одеднаш“ – вели Лиз.

Лиз се запознала со Најџел во 1996 година во клубот за „Скрабл“ во Крајстчрч, Нов Зеланд.

„Почна да игра ‘Скрабл’ со мајка си затоа што таа се измори од губење на карти против него. Мислеше дека можеби ќе има шанса да победи, бидејќи тој не беше добар по англиски во училиште,“ раскажува таа.

Сепак, Најџел наскоро почнал да ги победува сите во клубот, покажувајќи го својот талент од рана возраст.

Иако е светски познат, Ричардс не дава интервјуа и живее скромно. Сака да вози велосипед, а не пуши, не пие, не гледа телевизија и дури не слуша радио.