Цртеж купен за 12 долари во антикварница можеби е дело на Реноар вредно дури 1 милион долари

Хајди Марков, сопственичка на антикварницата Salvage Goods Antiques во Истон, учествувала на аукција во антикварница во округот Монтгомери во јануари, кога ѝ привлекол внимание еден цртеж на гола жена.
„Не го зедов во рака. Не го свртев. Само го погледнав и си помислив: ‘Јас го сакам ова дело’“, изјави Марков за телевизијата WPVI од Филаделфија.

Марков му кажала на својот партнер и син да наддаваат за уметничкото дело од 44 на 42 сантиметри, а самата продолжила да разгледува низ аукцијата.

„Имаше слики што се продаваа за 1.000, 2.000, 3.000 долари, а ова едноставно стоеше таму“, изјави таа.
Други предмети се продавале за илјадници долари, но нејзиниот избор го добила за само 12 долари.

„Овој цртеж веднаш ми изгледаше како нешто посебно“, изјави Марков за ABC News.

Кога го прегледала уметничкото дело дома, сфатила дека можеби била во право. Како сертифициран проценувач на уметнички дела, забележала дека рамката е во „совршена состојба“, а хартијата и печатот на задниот дел укажуваат дека делото било донесено во САД од реномиран увозник и продадено на истакнат колекционер.

Овие детали ја навеле да заклучи дека едвај видливиот потпис на цртежот припаѓа на легендарниот француски импресионист Реноар.

Истражувањата ја довеле до сомнеж дека делото можеби е портрет на сопругата на Реноар, Алин Шариго, и датира од крајот на 1800-тите, во периодот кога уметникот бил под влијание на Жан-Огист-Доминик Енгр и посветувал големо внимание на светлината и сенките.

За да биде сигурна, Марков се обратила до аукциската куќа Sotheby’s и била упатена кај друг експерт за проценка.
„Тој го прегледа делото и се согласи со мене. Ми рече: ‘Честитки’“, раскажа таа за WPVI.

Следниот чекор бил контакт со престижниот Wildenstein Plattner Institute (WPI), њујоршка непрофитна организација што се занимава со зачувување на уметничката историја. Тимот од институтот ќе го оцени цртежот на 10 април, процес што Марков го опиша како „ригорозен“.

„Тие се прилично строги во нивните анализи. Сум внимателно оптимистична“, изјави таа.

Реноар е познат како еден од основачите на импресионизмот заедно со Клод Моне, а неговите дела најчесто го прикажуваат парискиот живот со живописни бои.

Ако цртежот биде потврден како оригинално дело на Реноар, Марков планира да го продаде за „шест или седум цифрена сума“ на некој што ја цени импресионистичката уметност и ќе го изложи во својот дом.

„Ова е она што јас го нарекувам врамено ремек-дело“, изјави Марков за.