Дали мислите дека цените се високи во Македонија? Ова се најскапите пасоши во светот!

Дали мислите дека цените на личните документи се високи во Македонија? Во редовна постапка за пасош во Македонија ќе платите 1.800 денари, а во итна постапка 4.800 денари. Тоа е и до 12 пати помалку од цената на најскапите пасоши во светот.

Јапонците за изработка на пасош треба да платат 16.000 јени или околу 7.500 денари, а Новозеланѓаните 191 новозеландски долар или околу 7.000 денари. Пасошот во Велика Британија чини 75,50 фунти или околу 5.400 денари, јавува Си-Ен-Ен. Цените се однесуваат за редовните постапки.

Граѓаните на САД кои за прв пат издаваат пасош мора да издвојат 165 долари или околу 9.600 денари. Цената е околу 30 долари помалку кога станува збор за обновување на постоечки пасош.

Австралискиот пасош кој трае 10 години, пак, чини 301 австралиски долар или 12.000 денари, што е сепак поевтино од пасошот во Лихтенштајн кој достигнува 250 швајцарски франци или околу 14.600 денари.

Иако сирискиот пасош е на дното на листата на најмоќни пасоши во светот според индексот за пасоши, тој е еден од најскапите. Во 2015 година неговата цена порасна на неверојатни 23.200 денари во редовна постапка и 46.500 денари во итна постапка.

Во Либан треба да се издвои неверојатна сума од 1,2 милиони либански фунти или 46.300 за пасош со важност од 10 години. Цената е половина од цената на пасошот кој важи само пет години и изнесува 600.000 либански фунти или околу 23.000 денари.