Дали ова треба сите да го правиме пред да пиеме вода? Едноставен трик за отстранување на микропластиката од водата за пиење

Истражувачи од Медицинскиот универзитет во Гуангжу и Универзитетот Џинан во Кина открија едноставен метод за намалување на микропластиката во водата за пиење. Тие тестирале два вида вода: мека (со помалку минерали) и тврда (богата со минерали).

Научниците прво додале честички од микропластика во водата, потоа ја зовреле и ги отстраниле талогот што се формирал со едноставно филтрирање.

Резултатите покажале дека:

• Во некои случаи, 90% од микропластиката се отстранила со овој процес.
• Во тврда вода, каде што се создава повеќе бигор (калциум карбонат), методот бил поефикасен.
• Во мека вода, каде што има помалку калциум, сепак се отстраниле околу 25% од честичките.

Зошто бигорот помага?

Кога водата се загрева, калциум карбонатот излегува од растворот и создава слој на бигор (како оној што го гледаме во електричните бокали). Овој слој ги заробува честичките пластика, кои потоа можат лесно да се филтрираат со обичен метален филтер, сличен на оној за чај.

Дали треба почесто да пиеме зовриена вода?

Истражувачите велат дека пиењето зовриена вода може да биде едноставен начин за намалување на изложеноста на микропластика. Иако оваа навика е традиционална во некои делови од светот, тие се надеваат дека ќе стане пошироко прифатена.

Што следно?

Иако сè уште не е целосно разјаснето како микропластиката влијае врз нашето здравје, постојат докази дека може да го промени составот на цревната микрофлора и да ја зголеми отпорноста на бактериите кон антибиотици. Истражувачите бараат повеќе студии за тоа како зовриената вода може да помогне во заштита од овие ефекти.
Ова откритие покажува дека дури и едноставни навики, како што е зовривањето на водата, можат да направат разлика во борбата против микропластиката.