Депресијата и анксиозноста можат да се пренесат и преку плунка! Ново истражување на 268 брачни парови ја докажа поврзаноста
Истражување спроведено од научници од Иран, Индија, Италија и Обединетото Кралство открива дека депресијата, анксиозноста и нарушениот сон кај еден од брачните партнери можат да се пренесат и кај другиот преку микробиомот на устата. Студијата, објавена во Exploratory Research and Hypothesis in Medicine, го истражуваше овој феномен кај 268 неодамна венчани парови, каде едниот партнер страдал од нарушувања на спиењето и депресивно-тревожен фенотип, додека другиот бил клинички здрав.
Истражувачите открија дека по шест месеци заеднички живот, здравите партнери покажувале значително влошување на квалитетот на сонот, зголемени нивоа на депресија, анксиозност и стрес (мерен преку кортизол во плунката). Истовремено, кај нив се забележале значителни промени во микробиомот на устата, кој сè повеќе наликувал на тој на болните партнери. Особено е забележано зголемување на бактериите Clostridia, Veillonella, Bacillus и Lachnospiraceae, за кои претходно е утврдено дека се поврзани со психоневролошки нарушувања.
Физиолошка синхронизација кај партнерите
Составот на оралниот микробиом се покажал како значаен индикатор за појава на депресивно-тревожен фенотип (β = 0,37; p < 0,001), а тој пак влијаел на нивото на кортизол (β = 0,15; p < 0,001). Анализата покажала дека микробиомот посредува во развојот на овие состојби кај здравите партнери (R² = 0,35).
Овие наоди укажуваат дека физиолошката синхронизација кај брачните партнери — преку бактериите што се разменуваат при бакнежи и друг физички контакт — може да придонесе за развој на слични психолошки состојби. Истражувањето поставува темели за идни анализи на улогата на микробиомот не само во менталното здравје, туку и во преносот на други неинфективни болести меѓу блиски луѓе.
Коментирај анонимно