Доналд Трамп ја откри причината зошто никогаш не испил ни капка алкохол

Повторно избраниот американски претседател Доналд Трамп не консумира алкохол и тој во неколку наврати зборува за причината зошто.

Бидејќи води една од најмоќните земји во светот, од човек на таква позиција се очекува да биде воздржан од прекумерно пиење. Особено ако се земе предвид инцидентот со поранешниот претседател Ричард Никсон, кој наводно во алкохолизирана состојба наредил тактички нуклеарен напад врз Северна Кореја во април 1969 година, како одговор на соборувањето на американски шпионски авион.

Иако наредбата за напад била дадена од врховниот командант, неговите советници решиле да почекаат до следното утро, кога Никсон ќе биде трезен.

Во друга прилика, во 1973 година, Никсон бил толку пијан што не бил во можност да разговара по телефон со британскиот премиер Тед Хит. Исто така, во 1995 година, рускиот претседател Борис Елцин бил најден во пијана состојба во Вашингтон, стоејќи на Пенсилванија авенија во долна облека, обидувајќи се да стопира такси и да нарача пица.

И додека некои американски претседатели како Џорџ В. Буш и Џими Картер биле апстиненти додека биле на функција, Доналд Трамп изјавил дека никогаш во животот не консумирал алкохол.

Во интервју за „Вашингтон пост“ во 2019 година, тој откри дека смртта на неговиот брат Фред на 42-годишна возраст од срцев удар предизвикан од алкохолизам, го натерала да не пие.

Трамп изјави дека му рекол на својот брат дека „си го губи времето“ со алкохолот, а подоцна се каел што вршел притисок врз него да го напушти својот сон за да стане пилот и наместо тоа да ја преземе семејната компанија.

Гледајќи ги последиците што ги имал алкохолот врз неговиот брат, тоа му оставило длабок впечаток и го одвратило од консумирање алкохол.

„Тој беше толку убав, и видов што му направи алкохолот, дури и физички… и тоа имаше големо влијание врз мене,“ изјави Трамп, додавајќи дека можеби немаше да биде жив доколку пиел алкохол.

„Ајде да претпоставиме дека почнев да пијам, многу е веројатно дека денес не би разговарал со тебе.”

Наместо алкохол, омилениот пијалак на Доналд Трамп е диетална Кока-Кола.