Е вака се води бизнис: Сопственик на ресторан нуди парична награда за секој што ќе ги идентификува клиентите што му оставиле лоша рецензија: „Ќе напишете позитивна рецензија или ќе ве убијам“

Сопственикот на TOYOJIRO, високо оценет Jiro-стил ресторан за нудли во Кјото, Јапонија, објави „војна“ на двајца клиенти кои му дале ужасна еднозвездена рецензија. Тој на Инстаграм ја објави нивната фотографија и парична награда за секој што ќе ги идентификува, пренесува Dexerto.

„Го видов вашиот пост и делувате малку чудно. Се трудиме да не ги третираме луѓето како вас како клиенти, така што не е проблем,“ напиша сопственикот во објавата, која подоцна беше избришана.

„Но, подобро би било да избегнувате да јадете надвор. Еден ден, некој како вас ќе настрада. Не ми е гајле – само дојдете директно, и ќе се справам со вас.“

Во Инстаграм приказна, ресторанот понудил награда од 100.000 јени (околу 662 долари) за секој клиент, ветувајќи дека потрагата ќе трае сè додека двајцата не се вратат во ресторанот и не напишат позитивна рецензија.

„Единственото што може да направи е да се врати, да јаде повторно и да напише добра рецензија со фотографија. Му кажав дека нема да му простам – ни за безбедноста на неговото семејство. Ако го направи тоа, веднаш ќе биде убиен“ напиша сопственикот.

По бројните критики на социјалните мрежи за неговото агресивно однесување, сопственикот конечно попушти и се покаја за својата онлајн тирада.

„Свесен сум дека има и поддржувачи и критичари. За постапката што премина граници, размислувам и се покајувам. Ќе продолжам понатаму. Ви благодарам,“ напиша тој.

Ресторанот, исто така, објави извинување за неконтролираните изјави на сопственикот во пост што подоцна беше избришан:

„Нашиот ресторан, кој достигна шампионски статус на најголемата јапонска страница за нудли, Ramen Database, само еден месец по отворањето, длабоко жали за инцидентот што го предизвикавме … Ова доведе до срамен исход за нас. Посветени сме на тоа да се промениме и да станеме ресторан што навистина ќе биде поддржан од клиенти од целиот свет“.