Херојство што инспирира: Прилепчанка ризикуваше живот за да спаси заглавено кученце (ВИДЕО)

Во време кога рамнодушноста станува секојдневие, една млада Прилепчанка покажа дека хуманоста и љубовта кон животните сè уште се живи вредности.

Ангела, девојка од Прилеп, без двоумење се впушти во опасна мисија за да спаси мало беспомошно кученце заглавено во стара, полуурната куќа спроти Центарот за култура „Марко Цепенков“. Глетката го привлекла вниманието на минувачите, но токму таа одлучила да преземе акција.

И покрај ризикот, Ангела се искачила по нестабилниот ѕид и успеала внимателно да го извлече кученцето на сигурно место. Со многу трпение и љубов, го спасила животот на малото суштество, а потоа се погрижила и да му најде згрижување.

„Поминував случајно и видов луѓе како се обидуваат да помогнат, но не можеше лесно да се пристапи. Љубовта кон животните беше посилна од стравот. Иако теренот беше опасен и сè можеше да се сруши, срцето не ми даде да останам на страна“, напиша Ангела на својот профил на Фејсбук.

Таа додаде дека не го споделува видеото за пофалба, туку како поттик за сите да реагираат кога ќе видат беспомошно животно: „Секое живо суштество заслужува шанса.“

Благодарение на нејзината храброст и добрина, кученцето денес е безбедно — згрижено е од страна на PetLand Prilep, каде што е прегледано, вакцинирано и нахрането.

Овој гест е потсетник дека вистинските херои не секогаш носат наметки — понекогаш се луѓе со големо срце кои едноставно не можат да ја игнорираат туѓата болка.