Хуманоидниот робот Софија со смирувачки вести во Дубаи: „Луѓето немаат причина да се плашат од вештачката интелигенција“

Луѓето немаат причина да се плашат од вештачката интелигенција – тоа се зборовите на еден паметен робот.

Хуманоидниот робот Софија, познат по својот вознемирувачки изглед, се обрати на меѓународен технолошки самит во обид да ги намали стравовите дека роботите со вештачка интелигенција би можеле да го преземат светот и да го уништат човештвото. Иако нејзината порака звучеше смирувачки, поздравувајќи со „здраво луѓе и роботи“, многумина останаа скептични околу нејзините тврдења дека „ништо нема да тргне наопаку“.

На Самитот во Дубаи, футуристката Моника Биелските ја праша Софија дали роботите еден ден ќе се соочат со етички прашања, особено поради стравовите дека автономни машини би можеле да се свртат против своите креатори.

„Со фокусирање на емпатијата и социјалната ангажираност, имаме за цел да развиеме роботи кои го подобруваат човечкиот живот, истовремено одржувајќи етички интегритет“, одговори Софија. Таа истакна дека нејзиниот креатор, компанијата „Hanson Robotics“ со седиште во Хонг Конг, дава приоритет на транспарентноста, одговорноста и правичноста при развојот на роботите.

Софија, исто така, ги отфрли загриженостите дека роботите ќе им ја одземат работата на луѓето, ветувајќи хармонично сожителство. Таа потенцираше дека социјалните роботи можат да направат револуција во области како што се здравството и образованието. „Замислете роботи како емпатични придружници на постари пациенти или како алатки за персонализирано учење за учениците“, објасни таа.

Футуристката Биелските додаде дека научната фантастика нè условила да размислуваме во екстреми – дистопии или утопии.

„Но вистинскиот напредок лежи во создавањето на „протопија“ – средина каде што технологијата се усогласува со општествените, културните и еколошките вредности“, истакна таа.