Имам над 1.000 пајаци во мојата „пештера тарантула“ – им помагам на луѓето да го надминат стравот од нив

Запознајте го човекот кој живее со над 1.000 тарантули – и патува низ цела Англија за да им помогне на луѓето да го надминат стравот од овие суштества.

Арон Феникс (37) започнал да ги собира тарантулите во летото 2021 година како начин да си помогне на своето ментално здравје и верува дека е „роден за да ги спасува пајаците“.

Тој ги чува пајаците на две локации – во својата „пештера со тарантули“ во домот и на посебен простор за размножување – и вели дека најголемиот пајак е со големина на тањир.

По вниманието што го доби во медиумите минатата година за својата неверојатна колекција, Феникс додаде уште 300 пајаци во својот дом.

Благодарение на популарноста, Феникс сега патува низ Англија, помагајќи им на луѓето кои претходно се плашеле од овие животни да се заинтересираат за нив.

Феникс, кој работи како специјалист за преселување домови во Јејт, Јужен Глостершир, вели: „Сега имам над 1.000 пајаци. Звучи како многу, но во светот на пајаците, тоа не е така. Кога ќе почнете да ги размножувате пајаците, тие можат да имаат од 20 до неколку илјади бебиња. Минатата година спасив над 200 пајаци – постојано добивам пораки од луѓе кои имаат големи колекции и сакаат да ги намалат или пак ја загубиле љубовта кон ова хоби“.

Феникс започнал да собира пајаци кога лекарите му препорачале да најде хоби за да си помогне со своето ментално здравје, откако му била дијагностицирана биполарна нарушеност.

Инспирацијата ја добил од тарантулата што ја имал како тинејџер, но за жал морал да ја остави. Неговата колекција брзо се зголемила – и сега спасува напуштени арахниди низ целата земја, додека истовремено работи на тоа да ги продава животните на други колекционери и љубители на пајаци.

Феникс вели дека помагањето на луѓето да ги надминат своите стравови од пајаци е „исполнувачко“.

Тој додава: „По објавата на претходната приказна, многу луѓе ми пишаа со интерес за различните бои и видови, а многумина ме прашаа дали можам да им помогнам да го надминат стравот. Така што почнав да патувам низ целата земја. Навистина е забавно. Многу луѓе се фасцинирани од пајаците, па помагањето некому да премине од тоа да биде преплашен до тоа да држи пајак во рака е неверојатно. Во 9 од 10 случаи успевам да ги доведам до точка каде што можат да држат еден пајак. Навистина е наградувачко да им помагам на луѓето да ги надминат своите стравови – иако поголемиот дел од моето семејство сè уште се плаши од пајаци!“

Феникс исто така организира роденденски забави за деца и е фокусиран на отворање на својот центар за размножување.

Во однос на просторот потребен за складирање на 1.000 пајаци, Феникс вели дека не му треба толку многу простор колку што луѓето мислат.

Тој објаснува: „Верувале или не, тие се сместени во една соба. Имам мој простор што го подготвувам за размножување, а исто така имам и посебна соба во мојот дом. Ним не им треба многу простор, за разлика од змиите. Многу од младите пајаци се чуваат во мали пластични садови кога се млади. Верувам дека сум роден за да ги спасувам пајаците, да ги рехабилитирам и да им помагам на луѓето да го надминат стравот од нив. Кога станува збор за хранење и преместување, преземам мерки на претпазливост за да не побегнат“.