Кинески научници создадоа едноставен уред за производство на вода, кислород и гориво од месечевата почва
Идејата за човечки колонии на Месечината со години е преплавена со пречки – најголемата од нив е како луѓето би преживувале толку далеку од Земјата? Научниците конечно создадоа едноставен уред способен да произведе вода, кислород и дури и гориво – со користење само на месечевиот реголит и сончева светлина.
Месечевиот реголит содржи доволно вода и минерали за поддршка на живот, но традиционалните методи за извлекување ресурси се премногу сложени и бараат многу енергија. Ова ги прави речиси невозможни за долгорочно користење во идните месечеви населби.
Тим од Кина дизајнираше релативно едноставен реактор што користи енергија од Сонцето за да произведе вода, кислород и гориво од лунарниот реголит и издишаниот јаглероден диоксид од астронаутите. За испитувања се користени и вистински лунарни примероци од мисијата „Чанг’е-5“ и симулирана месечева почва од земјини карпи.
Сончевата енергија извлекува вода од лунарниот реголит. Потоа самата лунарна почва, богата со минерали, делува како катализатор за реакција меѓу јаглеродниот диоксид и водата. Резултатот: добивање на јаглерод моноксид, кислород и водород – основа за вода, дишење и гориво. Минералот илменит се покажал како најдобар катализатор, вели хемичарот Лу Ван.
Главниот предизвик останува: како оваа технологија да се прошири доволно за да обезбеди цели месечеви бази со потребна вода, кислород и гориво. Но, благодарение на бесплатната сончева енергија и тоа што не треба да се носат ресурси од Земјата, научниците веруваат дека ова ќе ја трансформира иднината на лунарните експедиции.
Коментирај анонимно