Кој би помислил дека мајмуните имаат смисла за хумор слично на луѓето? Научниците направија ново истражување со изненадувачки резултати

Многу луѓе мислат дека мајмуните се преслатки суштества, но кој би помислил дека и тие имаат смисла за хумор и се способни да се мајтапат исто како и луѓето? Неодамнешното истражување на тим научници од UCLA, Универзитетот во Индијана, УС Сан Диего и Институтот за однесување на животните Макс Планк во Германија, откри изненадувачка страна на животот на мајмуните.

Истражувачите откриле дека орангутаните, шимпанзата, бонобоата и горилите имаат смисла за хумор слично на луѓето. За време на нивните набљудувања, тие забележале дека овие четири видови мајмуни сакаат да се задеваат и да си играат со своите придружници.

Истражувачите исто така веруваат дека основната смисла за хумор кај луѓето е формирана пред најмалку 13 милиони години. Шегата и задевањето се клучен дел од човечката социјална интеракција, потпирајќи се на нашата социјална интелигенција и способноста да предвидиме што ќе се случи следно. Се чини дека мајмуните развиле слични вештини во социјалната игра и способност да ги препознаат очекувањата на другите.

Првиот автор на студијата, д-р Изабел Лаумер, рече: „Мајмуните се одлични кандидати за игриво задевање. Тие тесно се поврзуваат со нас, се вклучуваат во друштвена игра, се смеат и покажуваат релативно добро разбирање за очекувањата на другите“.

Во студијата, тимот забележал спонтани социјални интеракции на мајмуни кои вклучуваат игриво, благо вознемирувачко или провокативно однесување. Тие ги проучувале движењата на телото на мајмуните, изразите на лицето и реакциите на задевањето. Тимот пронашол 18 различни форми на задевање кои често биле користени за привлекување внимание или предизвикување одговор.

Вишиот автор на студијата, професорката Ерика Картмил, рече: „Мајмуните кои се задеваат често мавтаа со дел од телото или предмет пред очите на нивната цел, ги удираа со тупаници или боцкаа, ги гледаа во лицето, ги попречуваа нивните движења, ги влечеа за коса и преземаа други дејствија што беа тешко да се игнорираат. Разиграното задевање кај мајмуните обично е еднострано и ретко се возвраќа“.

Студијата исто така укажува на еволутивните корени на игривото задевање кај мајмуните.

Д-р Лаумер рече: „Присуството на разиграно задевање кај сите четири големи мајмуни и неговата сличност со игривото однесување кај човечките доенчиња сугерира дека овие вештини можеби се присутни кај нашиот последен заеднички предок, кој постоел пред најмалку 13 милиони години“.