Која е вредноста на човечкиот живот во Саудиска Арабија? Над 21.000 работници загинаа во изминативе 8 години, работејќи на футуристичкиот проект на принцот Мохамед Бин Салман

Визијата на принцот Мохамед бин Салман за Саудиска Арабија да изгледа како футуристички сон, за работниците е далеку поинаква, со загрижувачки извештаи за загубени животи и тешки услови за работа.

Според документарниот филм на ITV, „Кралството разоткриено: Внатре во Саудиска Арабија“, кој ги открива сведоштвата на мигрантските работници, се вели дека над 21,000 работници загинале во последните осум години додека работеле на големите проекти. Мигрантите, кои се дел од тимот што го гради неомскиот проект „The Line,“ се соочуваат со 16-часовни работни денови, често се принудени да работат 14 дена по ред, без доволно одмор и со ограничени плати.

Некои работници се чувствуваат „како робови“ и се жалат на непочитување на човековите права, а еден од нив изјави: „Саудиска Арабија не се грижи многу за странските граѓани. Нè третираат како просјаци“.

Проектот „Neom“, лоциран на северниот дел на Црвеното Море, е дел од иницијативата „Визија 2030“ која треба да ја трансформира Саудиска Арабија во глобална туристичка дестинација. Но, покрај ветувачките архитектонски достигнувања, проектот привлекол и зголемени критики за нехуманото третирање на мигрантите. Според извештаи, околу 100,000 работници исчезнале, а над 650 непалски работници загинале од необјаснети причини, што предизвикало протести и вознемиреност во нивните татковини. Непалскиот адвокат за човекови права, Анураг Девкота, изјави: „Мигрантите доаѓаат овде со надеж за подобар живот, но наместо тоа, се враќаат во ковчези“.

Организацијата „Neom“ изјави дека ги испитува обвинувањата во документарецот и ќе преземе соодветни мерки каде што е потребно. Саудиската влада не даде официјален коментар, а Националниот совет за безбедност тврди дека стапката на смртност на работниците во Саудиска Арабија е една од најниските глобално, изнесувајќи 1,12 на 100,000 работници.