Колку долго можеме да живееме? – Научниците утврдија колкав е максимумот на човечкиот живот
Иако идејата за вечен живот звучи примамливо, научниците сега веруваат дека човечкото тело има јасна биолошка граница. Според нови истражувања, над одредена возраст, телото ја губи способноста за регенерација и закрепнување, што го поставува прагот за максимален животен век на луѓето.
До ваквиот заклучок дошле научници од сингапурската биотехнолошка компанија „Геро“ и Центарот за рак „Росвел Парк“ во Бафало, Њујорк. Проучувајќи здравствени податоци од стотици илјади луѓе, тие утврдиле дека горната граница на човечкиот животен век изнесува помеѓу 120 и 150 години.
Што го ограничува животниот век?
Овој лимит е тесно поврзан со способноста на телото да се опоравува од стрес, болести и физички оптоварувања. Со текот на времето, таа способност опаѓа, што значи дека телото станува сè помалку отпорно и поранливо.
Како пример, најстарата документирана личност во историјата е Жан Калман, која живеела 122 години (родена во 1875, починала во 1997). Сепак, по нејзината смрт се појавија сомнежи – некои тврдат дека нејзината ќерка можеби се претставувала како Жан Калман.
Во реалноста, за мнозинството луѓе границата е многу пониска – околу 70 до 75 години. Но, новите научни сознанија сугерираат дека проширувањето на животниот век до 150 години не е невозможно.
Како науката се бори со стареењето?
Александар Тишковски, виш истражувач во Лабораторијата за системска биологија на стареењето при Московскиот државен универзитет „М. В. Ломоносов“, наведува неколку експерименти кои моментално се спроведуваат врз лабораториски глувци:
• Диети со низок внес на јаглехидрати: го продолжуваат животот за околу 30%.
• Генетска мутација поврзана со недостаток на хормон за раст: животот на глувците се зголемува до 50%.
• Лекови како метформин: го продолжуваат животот за 10–20%.
Моментално се тестираат и околу 10 нови лекови, кои покажуваат ветувачки резултати. Според Тишковски, ваквите терапии би можеле да бидат достапни за луѓето во наредните 10 до 15 години – под услов стареењето да се препознае како медицинска состојба.
Научниците се уверени дека до 2100 година, просечниот животен век во развиените земји ќе достигне околу 110 години, што значи дека децата родени во тој период можеби ќе живеат подолго од што досега сме можеле да замислиме.
Коментирај анонимно