Контранапад на Кинезите: Huawei развива нов AI чип за да му конкурира на американскиот гигант Nvidia

Huawei Technologies од Кина се подготвува да го тестира својот најнов и најмоќен процесор за вештачка интелигенција, со цел да замени дел од врвните производи на американскиот чип-гигант Nvidia, објави во неделата The Wall Street Journal.

Huawei веќе се обратил до неколку кинески технолошки компании за да ја тестираат техничката изводливост на новиот чип, кој се вика Ascend 910D, наведува извештајот, повикувајќи се на извори запознаени со прашањето.

Компанијата се надева дека најновата верзија на нејзините Ascend AI процесори ќе биде помоќна од Nvidia H100 чипот. Според информациите, Huawei треба да ја добие првата серија примероци од новиот процесор веќе кон крајот на мај.

Дополнително, Reuters во понеделникот објави дека Huawei планира да започне со масовни испораки на својот напреден Ascend 910C AI чип за кинеските клиенти уште од следниот месец.

Huawei и останатите кинески технолошки компании со години се соочуваат со предизвикот да развијат чипови од висока класа кои би можеле да се натпреваруваат со производите на Nvidia, особено за обука на модели на вештачка интелигенција — процес при кој на алгоритмите им се внесуваат огромни количини на податоци за да научат да донесуваат точни одлуки.

Во обид да го ограничи технолошкиот напредок на Кина, особено во областа на воените технологии, Вашингтон ги забрани најнапредните AI производи на Nvidia, вклучително и нивниот нов B200 чип, за продажба на кинескиот пазар.

Така, H100 чипот, на пример, беше забранет за продажба во Кина уште во 2022 година, пред официјално да биде лансиран.
Nvidia одби да коментира за новите информации, додека Huawei веднаш не одговори на барањето за коментар од страна на Reuters.