Лијам Нисон се подготвува за збогување со акцијата: „Имам 72 години, мора некогаш да се запре!“

Изгледа дека Лијам Нисон, 72-годишниот ирски актер, е подготвен да го затвори поглавјето на акционите улоги во својата кариера. Прочуен по филмови како „Taken“, „Star Wars“ и „The Grey“, Нисон потврди дека планира да се повлече од акционите сцени поради физичките предизвици кои сега се потешки за него.

„Имам 72 години – мора некогаш да се запре,“ изјави Нисон, признавајќи дека публиката лесно би забележала ако сцените ги изведува неговиот долгогодишен дублер, Марк Вансело.

Не одреди точен датум, но најави дека повлекувањето може да се случи до крајот на 2025 година. Неговиот следен филм, „Absolution“, ќе биде прикажуван премиерно во кино салите од 1 ноември и ќе го прикаже како остарен гангстер што се обидува да воспостави повторна врска со своите деца.

Нисон започна на филмското платно во 1978, а неговата кариера блесна со „Schindler’s List“, кој му донесе номинација за Оскар за најдобар актер. Иако имал шанса да стане Џејмс Бонд по тој успех, неговата сопруга Наташа Ричардсон го одвратила од улогата со услов – ако ја прифати, нема да има свадба.

„Таа ми даде ултиматум за Џејмс Бонд. И навистина беше сериозна“, спомена Нисон, додавајќи дека улогата на крај му припаднала со право на Пирс Броснан.