Многу украдени iPhone телефони од целиот свет се лоцирани во една иста зграда

Велика Британија – рај за крадци на телефони

Кражбите на мобилни телефони станаа секојдневие во последниве години, а ако не сте доволно внимателни додека шетате навечер, многу лесно можете да останете без својот уред. Еден уличен акробат, на пример, успеал да украде телефони вредни 4.200 евра за само неколку минути во Манчестер.

Лондон дури е наречен „престолнина на кражбите на телефони во Европа“. Иако експертите за технологија имаат некои брзи и корисни совети како да го заштитите телефонот за само пет секунди, реалноста е дека голем дел од луѓето не се запознаени со сајбер безбедност. А еднаш кога ќе ви го украдат телефонот, шансите да го вратите се мали – особено ако се земе предвид каде најчесто завршуваат.

Шенжен – последната дестинација на изгубените iPhone-и

Како што е познато, најголемиот дел од Apple уредите се произведуваат во Кина. Па така, ако ви го украдат телефонот, барем може да си помислите дека се вратил „дома“. Според Financial Times, огромен број украдени телефони завршуваат во т.н. „зграда на украдените iPhone-и“ во Шенжен.

Еден сопственик на iPhone 15 Pro успеал да го следи својот телефон од местото на кражбата сѐ до таа зграда во Кина – цели 9.500 километри подоцна. Таа локација е позната како место каде што телефони се поправаат или се надградуваат.
Сопственикот, откако го ставил телефонот во режим „изгубен или украден“, добил дури и уценувачка порака:
„Твојот стар iPhone е рециклиран од нас, ние сме само трговци со рециклирани уреди. Ние не сме тие што ти го украдоа телефонот.

Ако не го отстраниш од iCloud, матичната плоча ќе биде продадена на други клиенти – можеби ќе ти го хакираат телефонот или ќе ти ги украдат податоците.“

Иако ова е блеф, многу луѓе би се исплашиле и наседнале на ваква порака. Важно е да се знае дека од заклучен iPhone не може да се извлечат лични податоци. Така што – не паничете, само не отстранувајте го телефонот од iCloud и не одговарајте на уцени.