НАТО потврди дека четворица американски војници се убиени во Литванија откако исчезнале од мисијата за обука

Потрагата заврши со трагичен исход

Според официјални информации, војниците биле дел од 1-та бригада на 3-та пешадиска дивизија стационирана во Форт Стјуарт, Џорџија. Тие исчезнале додека спроведувале редовна тактичка обука, по што била организирана потрага во која учествуваа американската армија, литванските вооружени сили и други локални власти.
Нивното возило, оклопниот М88 Херкулес, беше пронајдено потопено во водена површина на тренинг полигонот, но точните околности кои довеле до трагедијата сè уште се истражуваат.

Реакции од НАТО и американската армија

Генералниот секретар на НАТО, Марк Руте, ја потврди трагичната вест и изрази сочувство до семејствата на загинатите.
„Ова е навистина страшна вест, нашите мисли се со семејствата и најблиските на војниците. Испратив порака до американскиот секретар за одбрана Пит Хегсет дека нашите мисли и молитви се со нивните семејства и со Соединетите Држави“, изјави Руте.

Командантот на V корпусот на американската армија, генерал-потполковник Чарлс Костанца, изрази благодарност до Литванија за брзата реакција во потрагата: „Сакам лично да им се заблагодарам на литванските вооружени сили и првите реагирачи кои веднаш ни помогнаа во потрагата. Оваа поддршка ја покажува важноста на нашето партнерство и хуманоста што ја споделуваме без разлика на знамето што го носиме на униформите.“