Научниците тврдат дека овој чест вирус може да предизвикa Алцхајмер

Истражувачи пронашле врска меѓу хронична инфекција на цревата предизвикана од чест вирус и развојот на Алцхајмерова болест кај некои луѓе.

Цитомегаловирусот (Cytomegalovirus, CMV) е чест херпес-вирус со кој повеќето луѓе доаѓаат во контакт во детството. По иницијалната инфекција, вирусот останува во телото доживотно, најчесто во неактивна состојба. До 80-та година од животот, 9 од 10 луѓе имаат антитела против CMV во крвта.

Вирусот се пренесува преку телесни течности (како мајчино млеко, плунка, крв и семена течност), но само кога е активен.

Кај мала група луѓе, вирусот може да остане активен доволно долго за да патува преку „суперпатот“ од цревата до мозокот – вагусниот нерв.

Откако ќе стигне до мозокот, активниот вирус може да го поттикне имунолошкиот систем и да придонесе за развојот на Алцхајмерова болест.

Ова е загрижувачка можност, но исто така отвора врата за нови третмани. Антивирусни лекови би можеле да спречат некои луѓе да развијат Алцхајмер, особено ако научниците успеат да создадат крвни тестови за брзо откривање на активни CMV инфекции во цревата.

Рани истражувања од тимот на Универзитетот во Аризона открија врска меѓу подтип на имунолошки клетки (CD83(+)), кои се поврзани со Алцхајмер, и високи нивоа на антитела во попречниот колон – што укажува на инфекција.

Микроглиите, клетки што се „чистачи“ на централниот нервен систем, играат важна улога тука. Тие отстрануваат плаки и оштетени неврони, но ако се постојано активирани, предизвикуваат воспаление и оштетување на мозочните клетки, што се поврзува со Алцхајмер.

„Мислиме дека откривме биолошки уникатен подтип на Алцхајмер, кој може да зафати 25 до 45 проценти од пациентите,“ вели Бен Ридхед, биомедицински научник и водечки автор.

Овој подтип вклучува амилоидни плаки и тау-протеини – микроскопски аномалии во мозокот – но и специфичен биолошки профил на вируси, антитела и имунолошки клетки.

Истражувачите анализирале органи од 101 донатор, од кои 66 имале Алцхајмер. Пронашле антитела на CMV во цревата, спиналната течност и мозокот, а вирусот бил пронајден и во вагусниот нерв.

Истите резултати биле потврдени во независна студија. Модели со човечки мозочни клетки покажале дека вирусот го зголемува производството на амилоид и тау-протеини, што доведува до дегенерација и смрт на невроните.

Важно е да се напомене дека оваа врска е пронајдена само кај мала подгрупа луѓе со хронична цревна CMV инфекција.

Тимот сега работи на крвен тест за откривање на CMV инфекции во цревата, со цел рано лекување и можност за спречување на овој тип Алцхајмер.